KQZ certifikon zgjedhjet, opozita numëron parregullsitë e procesit
Vukaj: “Nuk u respektua akti për veprimtaritë e ndaluara”. Çakaj: “Opozita u tërhoq nga qeveria teknike, por s’u zbatuan garancitë”
Pas gati tre muajsh nga data e zgjedhjeve të 25 prillit, certifikohet rezultati përfundimtar i tyre.
Edhe në mbledhjen e fundit për këtë proces zgjedhor anëtarët e Komisionit Rregullator janë ndarë me votë sipas qëndrimit që kanë subjektet politike që i kanë propozuar në atë proces. Kështu, rezultati përfundimtar u miratua me 3 vota pro dhe dy kundër. Në zgjedhjet parlamentare PS siguroi e vetme maxhorancën për të tretën herë radhazi me 74 mandate. Partia Demokratike, ndonëse shkoi në nivelin e 2013-ës, sërish nuk mundi të vinte në pushtet, pasi mori vetëm 59 mandate. Partia Lëvizja Socialiste për Integrim renditet forca e tretë në këto zgjedhje, por rezultati i saj shënoi rënie drastike, duke marrë vetëm 4 mandate, nga 19 që kishte në vitin 2017. Surpriza e këtyre zgjedhje ishte Partia Socialdemokrate e drejtuar nga Tom Doshi, që mori 3 mandate. KUNDËRSHTIMET
Anëtarët e opozitës, Helga Vukaj e PD-së dhe Muaharrem Çakaj i LSI-së votuan kundër rezultatit përfundimtar të zgjedhjeve, me argumentin se ky rezultat nuk garantoi vullnetin e shqiptarëve, duke akuzuar dhe maxhorancën për persona të inkriminuar. “Ky akt duhet të ishte gjurma finale e arritjes së suksesit. Duhet dëshmi e respektimit të detyrimit të mbajtjes larg nga procesi i administratës dhe mosndikimin e pushtetit nga institucionet qendrore. Duhej të ishte dëshmi e respektimit të transparencës. Kujtoj abuzimet me fondet publike. 926 milionë lekë të shpërndarë javën e fundit para zgjedhjeve. Qytetarët morën shpërblim të ndryshëm nga ai i targetuar dy vite më parë. Dhe pas zgjedhjeve të 25 prillit ky shpërblim u ndërpre si me thikë. Nuk dua të lë pa përmendur punësimet e panumërta në kundërshtim me aktin që nxorëm ne si Komision Rregullator. Dua të kujtoj edhe përdorimin e parave të pista ku partitë pa program dhe pa parim shpërndanë në këto zgjedhje”, tha Vukaj. Ndërsa Muharrem Çakaj kujtoi se një nga arsyet që opozita u tërhoq nga qeveria teknike ishte garancia e nenit për veprimtaritë e ndaluara, por që kjo nuk u zbatua. Ndaj ai kërkoi që rezultati final të mos miratohej. “Vlen të theksojmë se ashtu siç e kemi theksuar në të gjitha mbledhjet që kemi zhvilluar se një nga aktet që kemi miratuar është akti për veprimtarinë e ndaluar. Një nga kërkesat e opozitës që hoqi dorë më pas ishte qeveria teknike. Dhe opozita hoqi dorë pasi në Kodin Zgjedhor u vendos nenin 91 për veprimtaritë e ndaluara, duke pasur parasysh kushtet e barabarta”, tha Çakaj. Qëndrimeve të anëtarëve të Komisionit Rregullator të opozitës iu bashkua edhe përfaqësuesi i PDsë, Ivi Kaso, duke u kërkuar anëtarëve të tjerë të Komisionit Rregullator që të ngrihen në lartësinë e detyrës së tyre. “Vendimmarrja e sotme është shumë e rëndësishme, sepse është akti i fundit i procesit zgjedhor të 25 prillit. Por jo detyrimisht përfundon të gjithë procesin zgjedhor. Nuk jam dakord lidhur me faktin se Komisioni Rregullator është i kushtëzuar në vendimmarrjen e tij. Vlerësoj se Komisioni Rregullator duhet të ngrihet në pritshmërinë e vet dhe të mbajë një qëndrim ligjor lidhur me vlerësimin. Vlerësimi nuk mund të bëhet më mirë se në këtë rast nëse procesi zgjedhor i përmbushte standardet ligjore dhe morale. Është një proces që dha shenja të mbara bashkëpunimi”, tha Kaso.
IRONIA E PS Përkundër reagimeve të anëtarëve të opozitës, përfaqësuesi ligjor i PS-së vendosi të falënderojë shqiptarët, duke cituar kreun e opozitës, Lulzim Basha. “Vullneti i popullit është në kutitë e votimit. Kam besim të plotë se numëruesit do ta mbyllin këtë proces me përgjegjësi, durim e sipas ligjit. Në fund të këtij procesi Shqipëria fiton”, citoj kryetarin e opozitës, Lulzim Basha. Ai thotë falënderojmë të gjithë që zgjodhën ndryshimin. Këtë falënderim ne nuk e bëjmë dot më mirë sesa Basha. Në fund thotë durim sipas ligjit. Kështu kemi qenë të gjithë. Në këtë sallë janë drejtuar të gjitha ankimimet. Janë numëruar të gjitha kutitë që është kërkuar rinumërim. Është parë se si procesi ka qenë i drejtë dhe transparent. Unë iu kërkoj që të vendosni sipas ligjit. Ky vendim do të miratohet, sepse është formal. Kur flet gjykata, të gjithë heshtin; i zbatojnë, nuk i kundërshtojnë”, tha Eridian Salianji.