Raporti, ERRU paralajmëron rritjen e çmimit të ujit

“Ujësjellës-Kanalizime ka nevojë për 5 miliardë euro deri në vitin 2040 investime për furnizim pa ndërprerje në të gjithë vendin”

Sektori i UjësjellësKanalizimeve, për të shkuar drejt parametrave normalë të furnizimit pa ndërprerje dhe ofrimit të shërbimit në të gjithë vendin, ka nevojë për 5 miliardë euro deri në vitin 2040.

Enti Rregullator i Ujit (ERRU) në raportin e performancës së publikuar këto ditë, të përpunuar nga “Monitor”, nënvizon se kjo do të ishte e barabartë me investimin sistematik të afërsisht 200 milionë eurove çdo vit për çerekshekulli. Një pjesë të mirë të kësaj barre duket se shteti do ta faturojë te tarifat që konsumatorët paguajnë. “Investimet fizike në sektorin UK, referuar Master Planit Kombëtar për këtë fushë, të projektuara deri në vitin 2040, rezulton që të jenë rreth vlerës së 5 miliardë euro. Për përmbushjen e këtyre kërkesave kërkohen rreth 200 milionë euro/vit, duke pasur parasysh projektimin e tyre në 25 vite. Mënyra e synuar e financimit të nevojave fizike të sektorit përcaktohet në draftstrategjinë e financimit të sektorit të ujësjellës kanalizimeve nëpërmjet sistemit të 3T-ve, përkatësisht nga Taksat (buxheti i shtetit), Transferta (financimi i donatorëve), si dhe nga Tarifat (faturat e shërbimeve të ujësjellës kanalizimeve nga konsumatorët”, thuhet euro në vit duhet të paguajnë shqiptarët me qëllim që në fund të 25 viteve të ketë ujë pa ndalur në çezmat e tyre. Vetëm kjo do t’i jepte fund sagës së premtimeve boshe në çdo fushatë elektorale të çdo partie për furnizim me ujë 24/24 në raport. I njëjti vlerëson se në vitin e kaluar investimet e bëra në sektorin e ujësjellëskanalizimeve ishin 53 milionë euro. Sipas ERRU, një pjesë e financimeve është realizuar nga buxheti i shtetit përmes AKUM në vlerën 4.4 miliardë lekë ose 36 milionë euro (plus dhe vlerën e TVSH-së) dhe pjesa tjetër nga burimet e huaja përmes KfW & SECO në vlerën 2.1 miliardë lekë ose 17 milionë euro. Investimet e bëra sipas raportit kanë mundësuar ujë 24 orë në disa bashki. “Deri në mbyllje të vitit 2020 si rezultat i investimeve të kryera, rezulton të kemi furnizim me ujë pa ndërprerje (24 orë) për 22 qendra urbane (qytete), përkatësisht Fushë-Arrëz, Pukë, Vau i Dejës, Koplik, Lezhë, Rrëshen, Tropojë, Krujë, Cërrik, Peqin, Korçë, Pogradec, Maliq, Bilisht,

Kolonjë, Poliçan, Fier, Konispol, Tepelenë, Memaliaj, Këlcyrë dhe Përmet”, nënvizon ERRU. Sfidë për sektorin mbetet pjesa e kanalizimeve ku ende gati gjysma e vendit nuk është e mbuluar me këtë shërbim për largimin e kontrolluar të ujërave të përdorur. “Duhet theksuar se investimet e planifikuara në drejtim të kanalizimeve mbeten akoma një sfidë për t’u arritur në të ardhmen pasi mbulimi i sektorit me kanalizime në rang kombëtar mbetet akoma shumë i ulët, në masën e 51.5 %”, thuhet në raportin e performancës. Në një tjetër raport të mëparshëm, për të rritur efikasitetin nëpërmjet ekonomisë së shkallës, Enti Rregullator i Ujit (ERRU) propozon dy variante konkrete për agregimin (bashkimin) e ndërmarrjeve të ujësjellës-kanalizimeve. Në një prej alternativave thuhet që të aplikohet një faturë e unifikuar për sektorin në vlerën prej rreth 1400 lekë/ muaj, ndërsa aktualisht vlera mesatare e faturës mujore varion nga 350 deri në 2,000 lekë në muaj. Kjo automatikisht do të çonte në një katërfishim të faturës për ata që sot paguajnë me vlerë minimale. Vetë ERRU e pranon se kjo do të krijonte kosto të mëdha sociale, sidomos për zonën verilindore. Sektori po vuan dhe nga detyrimet e papaguara të energjisë. Ministria e Financave, në një raport të mëparshëm, ka propozuar që borxhet që ujësjellësit kanë për energjinë të futen në faturën e ujit. Ndërmarrjet e ujësjellësit, të cilat janë në administrim publik, kanë rikrijuar një borxh prej 17 miliardë lekësh ose 138 milionë eurosh ndaj OSHE-së deri në fund të vitit të kaluar. Ministria e Financave, në një prej alternativave për zgjidhjen e situatës, propozon që të bëhet zbatimi i plotë i reformës së ujit, ku do të reflektohet kosto e energjisë elektrike në tarifën e ujit në kuadër të rishikimit të metodologjisë të tarifave të ujit.