Basha: Ditë e trishtë, Urani ishte simboli i qëndresës antikomuniste
Kryetari i Partisë Demokratike, Lulzim Basha, zhvilloi homazhe në nderim të poetit dhe të veprimtarit antikomunist, Uran Kostreci, i cili u nda nga jeta dy ditë më parë. Në mesazhin e ngushëllimit, Basha tha se kemi humbur një kolos të qëndresës kundër diktaturës komuniste, simbolin e qëndresës antikomuniste dhe luftëtarin e lirisë që vitet e rinisë i kaloi në burgjet e diktaturës.
MESAZHI I PLOTË Sot është një ditë e trishtë, shumë e trishtë për të gjithë miqtë e Uran Kostrecit, për të përndjekurit politikë dhe pasardhësit e tyre, për të gjithë shqiptarët patriotë, ndahemi nga një njeri me vlera të jashtëzakonshme, me një dhimbje të dyfishtë, me vetëdijen që kemi humbur një kolos të qëndresës kundër diktaturës komuniste, një njeri që diti t’i përgjigjet dhimbjes, torturave dhe dramave me pastërtinë e shpirtit të tij, me një zemër të madhe që nuk u pushtua kurrë, as në vitet e gjata nëpër burgjet e komunizmit dhe as pas daljes prej tyre, por përkundrazi, prodhoi një nga veprat më të mëdha dhe më të thella, dëshmi të dhimbjes së jashtëzakonshme të një populli të tërë e në veçanti të atyre guximtarëve që çmimin e lirisë e paguan duke qenë të vetmit njerëz të lirë brenda burgjeve të komunizmit. Dhe së dyti, me vetëdijen se plejadës së këtyre qëndrestarëve pak nga pak po i mungojnë fizikisht kolosë të tillë si Uran Kostreci, ndërsa ne, brezit të ri dhe pasardhësve të tyre, na lind detyra e madhe patriotike dhe privilegji, nderi dhe pesha e përgjegjësisë për ta mbajtur përherë të gjallë, jo thjesht kujtimin e tyre, por kujtimin e guximit të shqiptarëve të rrallë si Uran Kostreci dhe shokët e tij përballë terrorit, diktaturës dhe mekanizmave të saj. Jam i bindur që sot shumica dërrmuese e atyre që e kanë njohur nga afër Uran Kostrecin, siç kam pasur privilegjin edhe personalisht dhe shumë më shumë të tjerë të cilët nuk e kanë pasur këtë privilegj por e kanë njohur përmes penës së tij, ndjej një zbrazëti në shpirt e i lutem Zotit që pastë prehjen e merituar në paqen e përjetshme, të na lërë të gjithëve ne e në veçanti familjarët e tij me kujtimet më të mira të këtij njeriu të rrallë me të cilin do të krenohej çdo komb. Ju faleminderit!