Dënohet me 10 vjet burg polici që vrau Klodian Rashën
Prokuroria kërkoi 20 vite burg, sipas akuzës vrasja u krye me dashje
Gjykata dënon me 15 vite burg efektivin e Policisë Nevaldo Hajdaraj, i akuzuar për vrasjen e të riut Klodian Rasha. Për shkak të gjykimit të shkurtuar, dënimi ndaj Hajdarajt ulet në 10 vite burgim.
Gjatë seancës së sotme, avokati i Hajdarajt kërkoi ndryshim të veprës penale nga “Vrasje me dashje”, në “Vrasje në tejkalim të mbrojtjes së nevojshme”, si dhe kërkoi të dënohet në minimum, kërkesë që nuk u pranua nga Gjykata. Vetë Hajdaraj nuk foli, por avokati shprehu pendesë dhe në emër të klientit i shprehu ngushëllime familjes. Në mesin e qershorit, Prokuroria e Tiranës ka kërkuar 20 vite burg për efektivin Nevaldo Hajdarajn. Në sajë të gjykimit të shkurtuar, i cili është pranuar, efektivit të Policisë i ulet 1/3 e dënimit, duke marrë një dënim 13 vite e 4 muaj burg, në rast se pretenca do të pranohej nga Gjykata. Sipas Prokurorisë, vrasja është kryer me dashje. Ndërkohë, ashtu si dhe dje që u dha vendimi, edhe gjatë seancës së pretencës, prezent në sallën e gjyqit ka qenë edhe babai i Klodian Rashës, Qazim Rasha. Kujtojmë se 25-vjeçari Klodian Rasha u vra më 8 dhjetor, nga ish-polici i “Shqiponjave”,
Nevaldo Hajdaraj. Ngjarja ka ndodhur në rrugën “Dritan Hoxha” rreth orës 01:10, ndërsa viktima ishte duke ecur në rrugicën pranë shtëpisë së tij, duke shkelur orën policore të vendosur për shkak të pandemisë. Pas vrasjes së Rashës, vendi u përshi nga protesta që zgjatën për disa ditë me radhë që pasuan me dorëheqjen e Sandër Lleshajt.
PAMJET E VRASJES Në ditën kur Prokuroria kërkoi 20 vite burg për ishpolicin Nevaldo Hajdaraj, janë publikuar edhe pamjet e trishta, të momentit të vrasjes së 25-vjeçarit Klodian Rasha. Video e fiksuar nga kamerat e sigurisë së zonës tregon gjithçka ndodhi rreth orës 02:00 të mesnatës së 8 dhjetorit 2020. Polici i kërkoi Klodianit të ndalojë, pasi ai u pa në rrugë në thyerje të orarit policor, vendosur për shkak të situatës nga pandemia. Në video duket Klodian Rasha në trotuar dhe polici që tenton ta kapë, por i riu vrapon. Polici rrëzohet, aty ulet në gjunjë dhe e qëllon mbas shpine Klodianin. Mbas të shtënave Klodiani vrapon edhe tre hapa e rrëzohet. Polici i afrohet dhe mbas tij dhe kolegu, ndërsa shfaqen në radio. Për pak sekonda Klodiani humb jetën.