Vlerësimi i mësuesve, si ankimohet rezultati
Drejtori në DPAP, Çifliku: Të skualifikuarit apo të pakënaqurit me pikët, kërkesë me shkrim në zyrën vendore, përgjigjja vjen brenda datës 21
Ora 14:00 e ditës së sotme është afati i fundit për mësuesit e pakënaqur nga vlerësimi i dosjes profesionale, pikët e së cilës luajnë rol në punësimin e tyre në vitin e ardhshëm shkollor.
Deri në mesin e javës së ardhshme, të gjithë mësuesit që bëjnë kërkesën me shkrim do të kenë përgjigjen e argumentuar, sipas përgjegjësit në Drejtorinë e Përgjithshme të Arsimit Parauniversitar, Fiqiri Çifliku. “Nga data 14 korrik deri ditën e premte, datë 16 korrik, çdo aplikant që ka pakënaqësi në lidhje me vlerësimin apo është skualifikuar, mund të bëjë ankesë me shkrim pranë zyrës vendore afër vendbanimit të tij/të saj. Zyra përcjell të gjitha ankimimet në Drejtoritë Rajonale dhe çdo rast do të marrë përgjigje brenda datës 21 korrik, që është dhe afati i fundit për shpalljen e listave përfundimtare të kandidatëve që vijojnë garën”,
MËSUES garojnë për vendet e lira të punës vetëm në njërën prej katër drejtorive rajonale, DPAP Durrës. Ndërsa në rang vendi numërohen afro 11 mijë mësues, ku jo të gjithë janë domosdoshmërisht të papunë. Në sistem kanë aplikuar edhe ata që dëshirojnë të rrisin performancën apo të aplikojnë për një vend më të mirë që mund të hapet. Gjithnjë, pa humbur vendin që kanë shprehet Çifliku për gazetën “Panorama”. Nuk janë pak ata që ankohen se nuk kanë gjetur emrin apo pikët që shpresonin të kishin, sikundër edhe ata që janë penalizuar për shkak të mosngarkimit të dosjes së plotë të dokumenteve në sistemin online. Gazeta boton sot vazhdimin e listës së vlerësimit të mësuesve që janë kualifikuar dhe ata që nuk e kalojnë dot këtë sitë për të vijuar me testimet që pritet të nisin në fund të muajit. Lista përfundimtare me pikët e vlerësimit të dosjes do të publikohet vetëm pasi të jenë shqyrtuar të gjitha ankimimet e kandidatëve për mësues. Sidoqoftë, kjo është vetëm një pjesë e vlerësimit final, pasi ka 20% të peshës në totalin e pikëve. Peshën kryesore e mban testimi, i cili vlerësohet me 80 pikë. Shumatorja e të dy treguesve do të përcaktojë renditjen e mësuesve në sistem për çdo profil apo zyrë arsimore. Me t’u liruar një vend, sistemi ndërmjetësues i punësimeve, portali “Mësues për Shqipërinë”, i nis ofertën automatikisht në email të parit në listë.