Analiza e zgjedhjeve, PD nxjerr shkaktarët e humbjes
Raporti përfundimtar; “mund të rikuperojmë mandate shtesë në qarqet Berat, Durrës, Fier, Gjirokastër, Shkodër, Tiranë dhe Vlorë”
Sekretari i Përgjithshëm i Partisë Demokratike, Gazment Bardhi, i prezantoi dje kryesisë së PD-së përmbledhjen e analizës së zgjedhjeve të 25 prillit.
Sipas analizës së prezantuar nga numri dy i selisë blu, PD arriti rezultat brenda pritshmërive vetëm në 8 qarqe. “Kanë pasur performancë brenda pritshmërisë së rezultateve historike të Partisë Demokratike qarqet Berat, Dibër, Elbasan, Fier, Kukës, Korçë, Lezhë dhe Vlorë”, thuhet në dokumentin e përmbledhjes së analizës së zgjedhjeve të PD-së. Por PD nuk ka arritur pritshmëritë në qarqet më të mëdha, siç është kryeqyteti, ku garonte edhe vetë kryedemokrati Lulzim Basha dhe ish-kreu i PD-së, Sali Berisha. Po ashtu, PD ka qenë jashtë pritshmërive të veta në qarqet Durrës, Shkodër e Gjirokastër. Sakaq, në përmbledhjen e analizës përfundimtare duket se PD është e dorëzuar dhe nuk synon më shumë mandate në 5 qarqe, ku bën pjesë edhe një nga qarqet më të mëdha të vendit, Elbasani, në të cilin në zgjedhjet e 25 prillit PD mori 6 mandate, ndërsa Partia Socialiste 8 të tilla. Në dokument rekomandohet që fokusi të përqendrohet në qarqet ku mund të rikuperohen mandate. “Në kushtet e masakrës zgjedhore, puna duhet të përqendrohet në qarqet ku ka mundësi reale për mandate të tjera shtesë, në qarqet Berat, Durrës, Fier, Gjirokastër, Shkodër, Tiranë dhe Vlorë. Për pasojë, e gjithë strategjia në vijimësi për të goditur me forcë krimet zgjedhore dhe fenomenet e paligjshme që kanë ndikuar në rezultat duhet të përqendrohet kryesisht në këto 7 qarqe. Ndërkohë që edhe në qarqet Elbasan, Korçë dhe Lezhë puna duhet të përqendrohet jo vetëm në ruajtjen e mandateve aktuale, por edhe në potencialin e shtimit të mandateve”, thuhet në pikën e fundit të konkluzioneve të analizës së zgjedhjeve në PD. ADMINISTRATA SHTETËRORE DHE
KONCESIONET Në analizën e faktorëve të jashtëm që ndikuan në zgjedhjet e fundit parlamentare, PD thotë se përdorimi i burimeve shtetërore dhe patronazhistët patën një ndikim thelbësor në rezultatin final të zgjedhjeve.
Përdorimi i të dhënave personale të shtetasve shqiptarë, si formë e ushtrimit të presionit ndaj qytetarëve dhe ofrimit të favoreve shtetërore për nevojat që ato mund të kishin. Media publikoi informacionet që përdoreshin nga PS me të dhënat personale të 910,000 qytetarëve, vetëm për qarkun Tiranë; pagesa e 125 milionë eurove të fondeve publike gjatë fushatës elektorale për mijëra familje të prekura nga tërmeti 2019, ku një pjesë e konsiderueshme e tyre ishin pagesa të përfituara në mënyrë fiktive; dhënia e koncesioneve të mëdha publike me vlerë qindra miliona euro; shpenzimi i rreth 120 milionë euro nga pushteti lokal i kontrolluar tërësisht nga Partia Socialiste për punë publike gjatë fushatës zgjedhore”, përmenden ndër të tjera në analizën e PD-së. Mbyllja e kufijve vetëm pak ditë para zgjedhjeve, gjithashtu sipas analizës së PDsë, ndikoi në rezultatin e zgjedhjeve. “Vetëm pak ditë para zgjedhjeve qeveria vendosi të mbyllë kufirin me Greqinë dhe Maqedoninë e Veriut nën pretekstin COVID19, duke bërë kështu votën e emigrantëve shqiptarë të pamundur. Kjo u reflektua në pjesëmarrjen e ulët në votime në Korçë, Vlorë dhe Gjirokastër”, theksohet në raport. Ndërsa një tjetër shqetësimi i PD-së është edhe maxhoranca e PS-së në Komisionin Qendror të Zgjedhjeve. Sipas analizës së të djathtëve, anëtarët e PS-së në KQZ vendosën të miratonin një fletë votimi të paqartë për qytetarët. “Shumica qeverisëse kontrolloi edhe procesin e vendimmarrjes së KQZ-së, duke ndërhyrë politikisht në ndryshimin e paraqitjes që ishte rënë dakord të fletëve të votimit në minutën e fundit, duke shkaktuar një konfuzion te votuesit. Kjo rezultoi në një rritje drastike të numrit të fletëvotimeve të pavlefshme, duke arritur një rekord të lartë prej 83 mijë votash, ose 5% të totalit vota, niveli më i lartë ndonjëherë në historinë zgjedhore shqiptare. Në terma praktikë, fletët e pavlefshme (83,019) kanë ndikuar në rezultatin e opozitës dhe përfitimin nga PS-PSD të të paktën 4 mandateve më shumë, për vetëm 4,254 vota në total (në Berat, Durrës, Korçë, dhe Shkodër)”, thuhet në analizën e prezantuar nga Bardhi. PËRFAQËSUESIT E
KRIMIT Një tjetër shkak që sipas selisë blu PD humbi zgjedhjet ishte angazhimi nga ana e kundërshtarit të tyre politik të bandave kriminale dhe përfaqësuesve të tyre. Sipas analizës së PD-së, bashkëpunimi i PS-së me krimin ka qenë në dy mënyra. Mënyra e parë, sipas PD-së, ka qenë angazhimi i karteleve të drogës, duke i ofruar në këmbim liri veprimi gjatë këtyre viteve. Ndërsa mënyra tjetër, sipas analizës së PD-së, ka qenë vendosja e kandidatëve për deputetë të personave që janë përfaqësues të grupeve kriminale. “Për të ndikuar në rezultatin e zgjedhjeve qeveria u angazhua në një operacion masiv dhe skemë sistematike në shkallë të gjerë të blerjes së votave, në bashkëpunim me kartelet e drogës dhe bandat më të rrezikshme të krimit të organizuar, të cilat në shumë raste u morën në mbrojtje nga Policia e Shtetit. Partia Socialiste vendosi disa përfaqësues të krimit të organizuar në listat e saj për deputetë”, thuhet në analizën e PD-së.