Vasili, thirrje SPAK: Hetoni aferën prej 2 miliardë eurosh në Durrës
Nënkryetari i LSI-së, Petrit Vasili, i bëri dje thirrje SPAK-ut të hetojë për atë që ai e cilëson si aferën mafioze prej 2 miliardë eurosh në portin e Durrësit. Me anë të një postimi në “Facebook”, Vasili shkruan se është “Një investim strategjik i një rëndësie të jashtëzakonshme në duart me të këqija të mundshme, që krijojnë hapësira pafund pastrimi parash nga qeveria”. “Porti i Durrësit dhe afera prej 2 miliardë euro është në duar të kompanive guaskë të regjistruara në parajsa fiskale, duke konfirmuar gjithçka që u dyshua që në fillim të saj. Një investim prej 2 miliardë euro shumë i errët dhe i kompromentuar rëndë në çdo pikëpamje. Një investim strategjik i një rëndësie të jashtëzakonshme në duart me të këqija të mundshme, që krijojnë hapësira pafund pastrimi parash nga qeveria dhe një korrupsioni gjigand e të pakontrolluar në favor të saj. Sekretarja amerikane e Thesarit, Janet Yellen, tha pak ditë më parë se: “Ndalimi i përdorimit të parajsave fiskale do t’i lejojë vendet të konkurrojnë bazuar mbi parimet ekonomike”. Marrëveshja për Portin e Durrësit shkel hapur Marrëveshjen e Stabilizim Asociimit dhe saktësisht nenin 71 pikat 1.2.3, si dhe nenin 74. Prandaj BE-ja deklaroi pak muaj me parë: “BE-ja është në dijeni të marrëveshjes së përfunduar në nëntor të vitit të kaluar midis Shqipërisë dhe Emirateve të Bashkuara Arabe, e cila përfshin një rizhvillim të madh të portit të Durrësit. SPAK-u duhej të fillonte urgjentisht hetimin, kryesisht për këtë skandal të përmasave gjigande ku implikimet janë gjithfarësh, që nga qeveria, Parlamenti dhe bota e errët mafioze kombëtare dhe ndërkombëtare. Mbyllja e syve nuk e shpëton dot as qeverinë, as SPAK-un vetë nga kjo përgjegjësi shumë e madhe. Sot, estradat e drejtësisë me regji, që fillon shfaqjet në Lushnje, udhëton në Pogradec dhe ndalon tek arkat me peshk, nuk mashtrojnë dot njeri. Të vërtetat kanë dalë sheshit dhe porti i Durrësit është pa asnjë diskutim kulmi i korrupsionit qeveritar gjigand”, shkruan Vasili në postimin e tij.