Mrekulli, Laçi e Vllaznia përmbysin për turin e dytë
Partizani i pandalshëm, gjen Bazelin pas tetë golave ndaj moldavëve të Sfintulit. Drita kualifikohet dhe e pret Fejnordi
Partizani, Vllaznia dhe Laçi bëjnë mrekullinë për të kaluar në turin e dytë të Konferencë Ligës, ku i pret Teuta si skuadër e eliminuar nga turi i parë i Champions-it.
Kësisoj, javën e ardhshme të katër ekipet shqiptare vijojnë rrugëtimin në Europë, në turneun që do të luajë finalen e parë në “Air Albania” në pranverën e vitit 2022.
PARTIZANI 8 gola dhe kualifikim, Partizani nuk ndalet as në Moldavi. “Demat” e Ilir Dajës fituan 2-3 sfidën e kthimit kundër Sfintulit, duke u kualifikuar në raundin e dytë të Ligës së Konferencës pas rezultatit të përgjithshëm 8-4. Në minutën e katërt, sulmuesi i Sfintulit, Volkov, gjuan por pret Alban Hoxha. Megjithatë, nga sfera e kthyer shkaktohet edhe një penallti. Sulmuesi Volkov merr përsipër ekzekutimin e saj dhe arrin të shënojë, duke mposhtur Hoxhën. Partizani e mori veten me kalimin e minutave dhe arriti të barazonte në të 15’-ën. Realizim fantastik i Carës, që vulosi baraspeshën. Megjithatë, Sfintul do të rikthehej shumë shpejt në avantazh. Duhej një gafë e mbrojtësit Sanja që Partizani të rikthente baraspeshën, pak sekonda para fundit të pjesës së parë. Në të 43’-ën mbrojtësi Sanja nuk e kthen siç duhet një top me kokë te portieri i tij dhe Zhunior përfiton, duke shënuar me një parabolë. Në minutën e 55-të, Stenio Zhunior konkretizon me gol një kundërsulm të frikshëm të “demave”. 2-3 për Partizanin dhe Sfintuli u dorëzua. Partizani mori një tjetër fitore përballë moldavëve, duke arritur të kualifikohet në turin e dytë me rezultat të përgjithshëm 8-4. Për të kuqtë përballja në turin tjetër është me skuadrën zvicerane të Bazelit.
VLLAZNIA “Mrekullia është mes nesh”. Profecia e mbrojtësit Mevlan Adili një ditë para ndeshjes me Shiroki Brijeg u bë realitet në “Loro Boriçi”, aty ku mbrëmja e djeshme foli me gjuhën e shkodranëve. Përmbysje e çmendur ndaj boshnjakëve dhe mjaftuan 90-minuta për të kaluar më tej, pasi kuqeblutë shënuan tri gola dhe heroi i mbrëmjes ishte padyshim sulmuesi nga Maqedonia e Veriut, Fahrudin Gjurgjeviç. Në ndeshjen e tij të parë si titullar me fanellën e Vllaznisë, ai bëri dopietë, ndërsa për kualifikimin duhej edhe goli i Eni Imamit. Humbja 3-1 në Bosnje dhe polemikat për gjykimin u zhvlerësuan pas një paraqitjeje fantastike në ndeshjen e kthimit. Pas një dekade vuajtjeje dhe larg pjesëmarrjes në Europë, Vllaznia më në fund rikthehet e bukur për t’u parë dhe për më tepër e suksesshme. Kualifikimi për në turin e dytë të Ligës së Konferencës është një hap i madh për shkodranët, që tashmë do të luajnë ndaj klubit qipriot AEL Limasol. Ndeshja e parë është më 22 korrik në transfertë, ndërsa ajo e kthimit më 29 korrik në Shkodër.
LAÇI Një penallti e humbur nga Mazrekaj dhe një gol i pësuar në ndeshjen e parë në Mal të Zi nuk e penguan Laçin. Përkundrazi, kurbinasit e drejtuar nga Shpëtim Duro, në ndeshjen e kthimit të luajtur në “Elbasan Arena”, ia dalin të bëjnë përmbysjen e madhe. Me ndihmën e kohës shtesë, bardhezinjtë siguruan kalimin në turin tjetër, ku përballë do të jetë Universitatea Kraiova, skuadër nën drejtimin e ishsulmuesit të mirënjohur, Adrian Mutu. Për ta barazuar rezultatin e kohës së rregullt vendosi goli i Ardit Deliut, ndërsa kurbinasit shpërdoruan një mori rastesh. Në shtesë Lushkja dhe në fund Prenga vulosën kualifikimin për në turin e dytë të Konferencë Ligës. DERBIT SHQIPTARË Në derbin e skuadrave shqiptare ia dolën të kualifikoheshin Drita dhe Shkupi, të cilat eliminuam respektivisht Deçiçin dhe Llapin. Drita u kualifikua pasi arriti të triumfonte dhe në shtëpinë e Deçiçit me rezultatin minimal 0-1. Goli për skuadrën kosovare u shënua nga Cuculi në minutën e 84-t të ndeshjes, teksa në fazën e dytë të Ligës së Konferencës Drita do të ketë përballë një skuadër me emër në Holandë, Fejnordin. Në sfidën tjetër Shkupi arriti të kualifikohej në një ndeshje mes tensionit me Llapin, teksa sfida u mbyll në barazim 1-1. Maqedonasit u kualifikuan pas fitores 2-0 në Shkup në sfidën e parë dhe në raundin tjetër do të përballen me portugezët e Santa Klarës.