ZGJEDHJET NE PD Emrat e 600 kandidatëve për Këshillin Kombëtar
Zbardhet debati i plotë, nga përplasja për raportin e analizës zgjedhore te ndryshimet statutore që miratohen të shtunën
DEBATET NË KRYESI/ Nga blerja e votës te ndikimi i fushatës, si e vlerëson PD procesin zgjedhor. Cilat janë 7 qarqet ku opozita mund të rritet dhe debati në kryesi për analizën e zgjedhjeve. Gazeta zbardh të plotë listën me 600 kandidatët e propozuar për anëtarë të Këshillit Kombëtar të Partisë Demokratike
Raporti përfundimtar i analizës së zgjedhjeve të 25 prillit krijoi pakënaqësi në mesin e drejtuesve politikë që iu besua të drejtonin fushatën zgjedhore. Duket se më të pakënaqurit ishin dy nënkryetarët e Partisë Demokratike, të cilët nuk mund të fshihnin kundërshtitë. I pari që reagoi kundër sekretarit të Përgjithshëm të Partisë Demokratike ishte drejtuesi politik i qarkut të Korçës, Edmond Spaho. Burime nga mbledhja brenda kryesisë së PD-së bën me dije për gazetën “Panorama” se Spaho i është drejtuar numrit dy të PD-së, duke i thënë se raporti nuk pasqyron të vërtetën. Sipas Spahos, nuk mund të thuhet në raport që qarku i Korçës nuk ka përmbushur pritshmëritë kur objektivi ka qenë 5 mandate dhe po aq mandate janë marrë, ndërsa analiza fokusohet te numri i votave. Ndërkohë, nënkryetari tjetër i PD-së, Edi Paloka, i cili ishte drejtues politik në qarkun e Durrësit i tha sekretarit të
PD-së, Gazment Bardhi, se raporti nuk ishte realist. Ndërsa mënyra sesi ishte përzgjedhur informacioni sipas Palokës, tregon se ka tendencë për të nxjerrë dikë keq dhe dikë mirë. Ndërkohë, një nga njohësit më të mirë të procesit zgjedhor në selinë blu që ka pasur rolin kryesor në reformat zgjedhore, Oerd Bylykbashi, mësohet të ketë thënë se objektivat që janë vendosur kanë qenë të gabuar. Sipas Bylykbashit, objektivi 705 mijë vota në të gjithë Shqipërinë ka qenë i vogël dhe duket sikur PD-ja është futur në zgjedhje për të humbur. Në përgjigje të akuzave ndaj tij, numri dy i PD-së është shprehur se metodologjia e hartimit dhe vendosja e kuotave është caktuar nga konsulentët. Ndërkohë, debati i dytë ka qenë mes Bashës dhe Fatbardh Kadillit për ndryshimet statutore. Kadilli ka prezantuar edhe një herë manifestin e tij politik. Ndërsa nga ana e tij, Basha është shprehur se statuti i PDsë është edhe më i hapur se statuti i partive simotra të PD-së në vendet europiane.