Vjedhje edhe nga ‘Facebook’, pranga anëtarit të bandës

Kush është 22-vjeçari i arrestuar. Operacioni “Transferta” zbuloi rrjetin e mashtrimit kompjuterik, midis të arrestuarve edhe femra

Një tjetër person ka përfunduar në pranga në kuadër të operacionit të koduar “Transferta”, duke e çuar në total 11 numrin e personave të arrestuar.

Në pranga përfundoi Endri Karimanllari, 22 vjeç, i akuzuar për mashtrim kompjuterik. Ai bashkë me anëtarët e tjerë të grupit, nëpërmjet ndërhyrjes në rrjetet sociale kishin arritur të grabisnin një shumë prej 38 mijë eurosh. “Ky shtetas, në bashkëpunim me shtetasit e tjerë të arrestuar, për një periudhë 1-vjeçare, ka ndërhyrë në llogari të ndryshme të rrjetit social ‘Facebook’, duke ndryshuar të dhënat e tyre dhe më pas i kanë përdorur për të komunikuar me miq të këtyre llogarive. Me anë të mashtrimit kanë kërkuar shuma të ndryshme monetare dhe si rezultat kanë përfituar shumën 38000 euro”, sqaron Policia.

OPERACIONI Operacioni i koduar “Transferta” për goditjen e veprimtarisë kriminale në fushën e krimeve kompjuterike, u finalizua më 7 korrik 2020 nga Policia e Tiranës, duke çuar në pranga 9 persona, kryesisht të rinj dhe në përbërje edhe femra. Në pranga përfunduan shtetasit: E. A., 29 vjeç, I. Q., 27 vjeç, A. M., 48 vjeç, A. T., 28 vjeçe, N. Sh., 21 vjeç, E. H., 33 vjeçe, A. Sh., 21 vjeç, A. A., 38 vjeç, dhe shtetasi me iniciale E. P., 30 vjeç, banues në Tiranë. Grupit iu sekuestruan 10 telefona, 10 karta “sim”, 3 pajisje elektronike dhe një faturë (mandat pagese) që provon mashtrimin. Ndërkohë, më 17 dhjetor 2020, përfundoi në pranga një tjetër pjesëtar i grupit. Shkëlzen Bytyçi, banues në Tiranë, u prangos në kuadër të operacionit, pasi ndaj tij ishte vendosur masa e sigurisë “Arrest me burg”. SKEMA E MASHTRIMIT

Pasi vidhnin profilet e qytetarëve në “Facebook”, grupi i kryesor nga i riu Erenik Peka dhe hakeri tjetër Alban Ahmetcenaj, u shkruanin të “afërmve” duke kërkuar para për arsye shëndetësore. Duke besuar se ata flisnin me të afërmit e tyre të vërtetë, qytetarë të ndryshëm u kanë dërguar shuma monetare, madje në disa raste edhe brenda ditës. Vlera që ata arrinin të merrnin janë të shumave të ndryshme, duke variuar nga 700 deri në 1 mijë euro. Por në një rast, siç specifikohet në dosje, dërgesa e parave dështoi. Një shqiptar në Gjermani i mashtruar nga 21-vjeçari Nazmi Shaba, zbuloi të vërtetën kur dërgoi dokumentin e transfertës në një tjetër rrjet komunikimi të të afërmit të tij dhe kështu kuptoi se nuk kishte folur me personin real. “Jam i afërmit yt, më ndihmon pasi më duhen para për të kuruar djalin, të paguaj kredinë, të shlyej dëmin e një aksidenti dhe të kthej një borxh pasi kam luajtur loto”, janë disa nga kërkesat që Erenik Peka dërgonte tek emigrantët nga Kukësi dhe Hasi që banonin në Angli, duke njohur kështu edhe lidhjet farefisnore. Me këtë skemë, Peka arriti të merrte para nga 26 vetë në Angli dhe disa qytetarë në Tiranë dhe më pas humbte gjurmët. Policia e Shtetit thekson se vijon puna për dokumentimin dhe mbledhjen e provave të tjera, si dhe për evidentimin dhe arrestimin e personave të tjerë të përfshirë në këtë aktivitet të kundërligjshëm. Materialet i kaluan Prokurorisë së Rrethit Gjyqësor Tiranë, për veprime të mëtejshme.