Del Monako: Rreziku i korrupsionit në prokurimet publike është i lartë
Ambasadori i Prezencës së OSBE-së në Tiranë, Vincenzo Del Monaco deklaroi se rreziku i korrupsionit në prokurimet publike në Shqipëri është i lartë. Në një takim “online” për nisjen e një bashkëpunimi të ngushtë për kryerjen e auditimeve të prokurimeve publike midis KLSH-së dhe Autoriteti Kombëtar Italian kundër Korrupsionit (ANAC), Del Monako u shpreh se përpjekjet për të rritur mbikëqyrjen e kësaj fushe, si edhe zbatimi i rekomandimeve për uljen e rreziqeve nuk kanë qenë kurrë më të rëndësishme. “Sikurse kemi parë në lajmet e këtyre ditëve në Shqipëri,
rreziku i korrupsionit në prokurimet publike është i lartë dhe përpjekjet për të rritur mbikëqyrjen e kësaj fushe, si edhe zbatimi i rekomandimeve për uljen e rreziqeve nuk kanë qenë kurrë më të rëndësishme. Këto rreziqe po merren shumë seriozisht nga autoritetet shqiptare dhe Shqipëria po fillon të shohë rezultatet e institucioneve të reja gjyqësore. Por, më shumë mund të bëhet dhe nga institucione të tjera si për shembull KLSH-ja, institucione që janë hallka kritike të sistemit në identifikimin dhe raportimin e dëmeve. Shembull i luftës kundër kriminalitetit në tërësi, përfshi dhe korrupsionin janë institucionet ligjzbatuese italiane, të cilat kanë bërë jo vetëm një histori suksesi, por një histori heroike”, tha ambasadori Del Monaco. Ndërkohë, kryetari i KLSH-së, Arben Shehu, falënderoi Presidentin e Autoritetit Kombëtar Italian kundër Korrupsionit, z. Giuseppe Busia dhe ambasadorin e prezencës së OSBE-së në Tiranë, z. Vincenzo Del Monaco duke theksuar rëndësinë e madhe që ka lufta kundër korrupsionit në Shqipëri dhe asistenca për institucionet kontrolluese.