Spastrime dhe promovime, emrat e 300 anëtarëve të rinj të Këshillit të PD, sfida e Mark Markut: Duhet rithemelim
FJALIMI I PLOTE I DEPUTETIT PARA KUVENDIT DEMOKRAT. ÇFARE THA BASHA DHE REAGIMI I BERISHES PER RIKTHIMIN NE KUVEND
Rreth 5500 delegatë të Kuvendit Kombëtar zgjodhën të shtunën 300 anëtarët e rinj të Këshillit Kombëtar. Qarku i Elbasanit, ku është drejtues politik sekretari i përgjithshëm i PD-së, duket se këtë herë ka qenë më i privilegjuari sa u përket vendeve që do ketë në Këshillin Kombëtar.
Sipas burimeve të gazetës “Panorama”, degët e PD-së në Qarkun e Elbasanit propozuan 37 kandidatë për në Këshillin Kombëtar, ndërsa në rezultatin përfundimtar të nxjerrë nga PD rezulton se prej 37 kandidatëve janë zgjedhur 26. Ndërkohë, Shkodra që mësohet se ka pasur afërsisht të njëjtin numër propozimesh ka shumë herë më pak anëtarë të zgjedhur. Në rezultatin final vërehet se nga rreth 35 kandidatura janë zgjedhur vetëm 6 apo 7 në Këshillin Kombëtar. Shumë më i ulët nëse krahasohet me Elbasanin. Në të njëjtin nivel qëndron edhe Kukësi që është një bastion i fortifikuar i djathtë. Gazeta “Panorama” mëson se në Kukës ka pasur 10 propozime, nga ku janë zgjedhur vetëm 3 anëtarë.
PËRJASHTIMET
Duket se demokratët janë treguar shumë hakmarrës në votime për Këshillin Kombëtar. Në listën më anëtarët e rinj të Këshillit Kombëtar vërehet një listën e gjatë mungesash. Edit Harxhi, Arben Ristani, Ardjan Isufi, Halim Kosova, Kastriot Islami, Klodiana Shala, Niazi Kosovrasti, Sait Dollapi, Valentina Duka, Erald Kapri, nuk do të jenë anëtarë të Këshillit Kombëtar. Kujtojmë që Edit Harxhi kandidoi për kryetar të PDsë kundër Lulzim Bashës. Ajo bashkë me Bujar Nishanin dhe një grup me ish-figura të larta të PD-së kritikuan mënyrën e drejtimit të PD-së nga Basha. Në zgjedhjet e 13 qershorit kundër Bashës, Harxhi mori mbi 800 vota ndërkohë të shtunën nuk ka marrë vota mjaftueshëm nga 5500 delegatët e Kuvendit që votuan. Anëtar i Këshillit Kombëtar nuk do të jetë as Halim Kosova, i cili drejton komisionin e “vetingut” në PD. Ai u la edhe jashtë listës së PD-së për kandidatë për deputetë dhe hodhi mjaft kritika ndaj lidershipit të PD-së. Në mesin e të
larguarve është edhe Sahit Dollapi, i cili pas zgjedhjeve të 25 prillit dha dorëheqjen edhe nga posti që i dha Basha si sekretar organizativ. Ndërsa Erald Kapri duket se e ka pësuar pasi në zgjedhjet për kryetar të PD-së, u angazhua me kandidatin Agron Shehaj. Kujtojmë që Kapri ishte pjesë e kandidatëve të PD-së deri në listën finale në Qarkun e Pogradecit, por tanimë nuk do të jetë as pjesë e Këshillit Kombëtar të PD-së.