Këshilli i ri Kombëtar, Basha: Jemi e vetmja shpresë për ndryshim

Kreu i PD-së, mesazh për bashkim: Një thirrje për të gjithë ata që janë larguar, nëse keni dëshirë të jepni kontributin tuaj, jeni të mirëpritur

Menjëherë sapo janë zgjedhur si anëtarë të Këshillit Kombëtar të PD-së, kryedemokrati Lulzim Basha, përmes një postimi në rrjetet sociale, pasi i uroi anëtarët e rinj, iu kërkoi që ata të bëhen zëri dhe veshi i qytetarëve.

Sipas kreut të PD-së, opozita është e vetmja shpresë për shqiptarët për të ndryshuar. “Mirënjohje për delegatët që në Kuvendin Kombëtar përfaqësuan demokratët anembanë Shqipërisë. Suksese Këshillit Kombëtar të përzgjedhur! Keni besimin e demokrateve dhe demokratëve dhe përgjegjësinë për të luftuar çdo ditë pranë qytetarëve, për shqetësimet e vogla dhe të mëdha të familjeve shqiptare, për të kapërcyer bashkërisht vështirësitë dhe për të qenë zëri i tyre përballë çdo padrejtësie. Sfidat që kemi përpara janë të mëdha, por vullneti dhe vendosmëria jonë po ashtu. Këshilli i ri, i hapur për më shumë zonja dhe zonjusha, më shumë të rinj dhe të reja, do të jetë një urë bashkëpunimi me shoqërinë, për të ndërtuar së bashku një platformë qytetare për demokracinë, sepse ne jemi e vetmja shpresë për shqiptarët që kërkojnë ndryshim”, shkroi Lulzim Basha.

MESAZHI PËR BASHKIM

Ndërkohë, në fjalën e tij të shtunën në Kuvendin Kombëtar kreu i PD-së ftoi edhe kritikët dhe të larguarit që nëse duan të vijnë e të japin kontributin në selinë blu. “Unë kam edhe një thirrje për të gjithë ata që janë larguar nga familja jonë politike. Unë u them atyre, se nëse keni dëshirë të jepni kontributin tuaj apo të ktheni besimin e demokratëve që ju kanë ndër vite, jeni të mirëpritur”, tha Basha. Sipas tij, dora do të jetë e shtrirë dhe gjithmonë e hapur, pasi nuk do lejohet të abuzohet me sakrificat e demokratëve për t’i përkthyer Por nuk duhet ta mendoni se unë do t’u kthej më faqen tjetër, që ju të abuzoni me sakrificat e demokratëve për t’i përkthyer ato në përfitime personale”, tha Basha. Në fjalën e tij, kryedemokrati dha një mesazh edhe për të rinjtë, duke theksuar se kjo do të jetë një ëndërr që ky brez do të na përfaqësojë plot me dinjitet në familjen tonë të madhe europiane. “Unë e dua Europën, jo vetëm për atë që përfaqëson dhe mundësitë që u krijon shqiptarëve, por se kam një ëndërr dhe shumë shpejt ajo do të realizohet. Unë do të shoh të rinjtë dhe të rejat e këtij vendi që të na përfaqësojnë me dinjitet, kurajë dhe inteligjencë në familjen tonë të madhe europiane. Dhe kjo ëndërr do të realizohet shumë shpejt”, tha ai.

PLATFORMA E DEMOKRACISË

Ndërkohë, të shtunën, kreu i PD-së konkretizoi edhe propozimin për krijimin e një platforme qytetare për demokracinë. Basha tha se partia që ai drejton do të bashkëpunojë me çdo grup shoqëror për të arritur atë që ai e quan normalizim të demokracisë. Basha tha se rruga drejt realizimit të këtij misioni nuk është e lehtë dhe as e tillë që Partia Demokratike mund ta përshkojë e vetme. “Ajo fillon duke u dhënë pushtet qytetarëve. Ndaj me forcën që na dhanë qytetarët në 25 prill, ne ftojmë shumicën e shqiptarëve që kërkojnë ndryshim rrënjësor në punët e vendit, dhe rezultate të prekshme për veten dhe fëmijët e tyre, që të ndërtojmë së bashku një Platformë Qytetare për Demokracinë”, tha ai. Kryedemokrati theksoi se ndërtimi i kësaj platforme do të ketë në themelin e saj rikthimin e legjitimitetit dhe demokracisë në vend. “Ne do të bashkëpunojmë me të gjitha grupet shoqërore: Intelektualë, studentë, pedagogë, sipërmarrës, artistë, gazetarë, profesionistë, fermerë, të rinj e të reja që kërkojnë kthimin e normalitetit në vend. Që kërkojnë zgjedhje të lira, ndryshime kushtetuese dhe ligjore që garantojnë ndarjen dhe balancimin e pushteteve, që përmirësojnë përfaqësimin politik, që reformojnë ndarjen territoriale dhe demokratizojnë pushtetin vendor. Që mundësojnë ushtrimin e demokracisë së drejtpërdrejtë nëpërmjet referendumeve lokale dhe kombëtare, propozime për çlirimin e ekonomisë nga oligarkët dhe modelit të dështuar ekonomik që po i marrin frymën sipërmarrjes së ndershme, për lirinë dhe pavarësinë e medias, për shkëputjen përfundimtare të politikës nga krimi, ndryshime që e bëjnë shoqërinë realisht demokratike dhe e shpëtojnë shtetin nga kapja e një pakice që kërcënon të ardhmen e vendit”, u shpreh ai. Sakaq, pas zgjedhjes së anëtarëve të rinj të Këshillit Kombëtar, PD pritet të zgjedhë edhe strukturat kryesore drejtuese të partisë. Gazeta “Panorama” ka mësuar se brenda muajit korrik Këshilli i ri Kombëtar do të votojë për sekretariatet, kryesinë e re dhe nënkryetarët. Ndërkohë, sipas statutit të ri të miratuar ditën e shtunë, kryesia e PD-së do të jetë më e zgjeruar, ndërkohë do të ndryshojë edhe mënyra e përzgjedhjes së kandidatëve për kryetar bashkish. Do të ndiqet e njëjta formulë si me kandidatët për deputetë.