Fitore për Socialdemokratët, koalicioni qeveritar mund të jetë trepalësh
Gjermanët kanë votuar të dielën për të zgjedhur pasuesin e Angea Merkelit në krye të ekzekutivit të ri, me një rezultat shumë të ngushtë mes socialdemokratëve dhe kristiandemokratëve. Largimi i Merkel nga politika ka treguar ndikim të menjëhershëm në partinë e saj kristiandemokrate, CDU, ku konservatorët të dielën kanë parë rezultatin më të dobët të tyre në dekadat e pasluftës. Qendra e majtë, SPD, edhe pse me një rezultat të ngushtë, është në avantazh. Të dy partitë thanë se janë të gatshme të formojnë koalicionin e ardhshëm. Ndërkohë, të gjelbrit janë në vendin e tretë, të ndjekur nga FDPja, AfD dhe e majta. Pas mbyllje së zgjedhjeve, liderët e partive në Gjermani janë mbledhur në një tryezë të rrumbullakët për të debatuar mbi rezultatin. Ata janë deklaruar se ka gjasë të formohet një koalicion trepalësh. Lideri socialdemokrat, Olaf Scholz, i cili me gjasë mund të jetë kancelari i ardhshëm gjerman, tha se “Mund të na duhet të jemi tri parti”. Ndërsa Armin Laschet, lideri i qendrës së djathtë, kristiandemokratëve, e cilësoi “jo të mirë” rënien e mbështetjes për partinë e tyre, por gjithashtu pohoi se mund të ishte një zgjidhje më e mirë nëse do të ishin tre parti në koalciionin qeveritar, bazuar në mbështetjen që kanë marrë nga zgjedhësit. “Nuk ka lidhje me formimin e një qeverie duke përdorur matematikën. Në duam një qeverisje që të përbëhet nga një koalicion që ta pëlqejmë. Ajo që na duhet është një aleancë që unifikon Gjermaninë”, tha ai. Markus Soder, lider i kristiandemokratëve bavarezë, partisë simotër CSU, e vlerësoi Laschet. Annalena Baerbock lidere e të gjelbërve tha se “jemi një ekip në të gjitha bisedimet eksploruese. Duam të drejtojmë vendin dhe kemi një mandat të qartë që Partia e Gjelbër të zbatojë programin në qeverinë e re”. Procesi për të formuar qeverinë e re mund të marrë disa javë ose muaj. Negociatat për koalicionin pas zgjedhjeve të vitit 2017 ishin më të gjatat në historinë e Gjermanisë dhe e lanë vendin pa një qeveri për pothuajse gjashtë muaj. Në tetë vitet e fundit, nën drejtimin e kancelares Angela Merkel, ka qenë në fuqi koalicioni mes kristiandemokratëve dhe socialdemokratëve.
Projeksionet e fundit kanë treguar se socialdemokratët janë të parët në renditje dhe e kanë zgjeruar diferencën me kristiandemokratët.