Vuçiç po përdor targat për përshkallëzim me Kosovën
Borell, thirrje Kosovës e Serbisë: Tërhiqni Policinë dhe barrikadat
Presidenti i Serbisë, Aleksandar Vuçiç, e ka përdorur situatën me reciprocitetin për targat në Veriun e Kosovës për të treguar forcën ushtarake të Serbisë, duke shkuar drejt një përshkallëzimi të situatës, të cilën e ka mbështetur plotësisht edhe pasi ka biseduar në telefon me Sekretarin e Përgjithshëm të NATO-s, Jens Stoltenberg.
Stoltenberg, i cili bisedoi edhe me Kryeministrin e Kosovës, Albin Kurtin, tha se folën për situatën shqetësuese në veri të Kosovës. Vuçiç, pas bisedës, e quajti “pushtim” praninë e forcave speciale të Policisë së Kosovës në pikat kufitare me Serbinë, ndërsa tha se Serbia s’ka nevojë ta pyesë askënd për avionët ushtarakë që përshkuan qiellin mbi pikëkalimet kufitare në Jarinjë dhe Bërnjak. “Pushtimi i plotë me automjete të blinduara në veri të Kosovës, i cili po udhëhiqet nga Prishtina, po vazhdon për ditën e shtatë me radhë”, tha Vuçiç. “Të gjithë papritmas shqetësohen kur shohin helikopterë dhe aeroplanë serbë, sepse mendojnë se ata nuk duhet të ekzistojnë, ose nuk duhet të ngrihen derisa Kurti ose dikush nga bashkësia ndërkombëtare ta miratojë këtë”, tha Presidenti serb. Ai theksoi sërish kërkesën për formimin e Asociacionit të komunave me shumicë serbe. Stoltenberg tha se është jetike që Prishtina dhe Beogradi të përmbahen dhe t’i kthehen dialogut. Të shtunën, Qendra e Regjistrimit të Automjeteve në Zubin Potok është djegur, si dhe është sulmuar Qendra e Regjistrimit Civil në Zveçan. Sipas hetimeve preliminare aty janë hedhur dy bomba dore, të cilat nuk kanë shpërthyer. Për shkak të zhvillimeve në veri, presidentja e Kosovës, Vjosa Osmani e ndërpreu vizitën e saj në Shtetet e Bashkuara dhe u nis drejt Kosovës. Gjatë të shtunës, kryeministri Albin Kurti deklaroi se dy sulmet në veri, ishin të qëllimshme.
Situata në Veri duket se ka krijuar shqetësim edhe të përfaqësuesi i lartë i Bashkimit Evropian për Politikë të Jashtme dhe Siguri, Josep Borrell, i cili u ka bërë thirrje Kosovës dhe Serbisë që të largojnë menjëherë policinë speciale dhe barrikadat në veri të Kosovës. Borell është shprehur se po vazhdon të ndjekë nga afër situatën në veri të Kosovës. “Serbia dhe Kosova duhet të mos përshkallëzojnë pa kushte situatën në terren, duke tërhequr menjëherë njësitë speciale të policisë dhe duke çmontuar postblloqet. Çdo provokim i mëtejshëm ose veprime të njëanshme dhe të pakoordinuara janë të papranueshme”, tha ai. Sipas tij, Kosova dhe Serbia duhet të gjejnë zgjidhje për të zbutur situatën dhe për të rënë dakord për rrugën përpara, prandaj “BEja do t’i mbështesë në mënyrë aktive këto përpjekje. Udhëheqësit e Kosovës dhe të Serbisë janë plotësisht përgjegjës për çdo rrezik për sigurinë dhe mirëqenien e komuniteteve lokale si në Kosovë ashtu edhe në Serbi. E theksova këtë në thirrjet e mia me Presidentin Vuçiç dhe Kryeministrin Kurti këtë javë”. Borell theksoi se dialogu i lehtësuar nga BE-ja vazhdon të jetë platforma e vetme për të adresuar dhe zgjidhur të gjitha çështjet e hapura midis palëve, përfshirë ato që lidhen me lirinë e lëvizjes dhe targat. “Ardhja e të dy kryenegociatorëve në Bruksel ditët në vijim është hapi i parë pozitiv. Thelbësore është që ata të vijnë me një mandat për të diskutuar rrugën përpara dhe për të gjetur zgjidhje të qëndrueshme që janë në interes të qytetarëve. Ne e përsërisim, që presim që Kosova dhe Serbia të kthehen në nxitjen e një mjedisi të favorshëm për pajtimin, stabilitetin rajonal dhe bashkëpunimin në të mirë të qytetarëve të tyre. Kjo është thelbësore për arritjen e një marrëveshjeje gjithëpërfshirëse dhe ligjërisht detyruese për normalizimin e marrëdhënieve të tyre, e cila është e nevojshme që të dy të përparojnë në rrugët e tyre përkatëse evropiane”, shtoi ai.
Borell ka thënë se është në kontakt të ngushtë me Sekretarin e Përgjithshëm të NATO-s, të cilin e falënderoi për bashkëpunimin e shkëlqyer mes KFOR-it dhe EULEX-it. “KFOR-i luan një rol kyç në mbështetjen e stabilitetit rajonal në Ballkanin Perëndimor”, tha ai.