Bajrami shënon sërish, shkëlqejnë Uzuni e Selahi
Beratasi i bën të gjitha në Hungari, spikat edhe mesfushori
Mesfushori i Kombëtares Nedim Bajrami gjeti rrugën e rrjetës në triumfin 4-2 që skuadra e Empolit arriti në shtëpi ndaj Bolonjës, në sfidën e vlefshme për javën e 6-të të Serisë A.
Ky ishte goli i dytë në kampionat për futbollistin shqiptar, që është shndërruar në një lider te skuadra italiane. Në minutën e 53-të, Bajrami shndërroi në gol një penallti duke çuar në 3-1 rezultatin e sfidës. Numri 10 i Empolit qëndroi në fushë 80 minuta, teksa më pas u zëvendësua nga talenti elbasanas Kristjan Asllani. 19-vjeçari që është pjesë e Kombëtares Shpresa luan ndeshjen e dytë për ekipin e parë të Empolit. Edhe pse pak minuta, ky është vetëm fillimi për Asllanin, pasi nuk është e lehtë të luash në këtë moshë në një nga ligat më të forta në botë, siç është Seria A.
Ardian Ismajli - Mbrojtësi nuk ishte i disponueshëm për Empolin gjatë ndeshjes së djeshme dhe nuk bënte pjesë as në stolin e lojtarëve rezervë.
Myrto Uzuni - Vazhdon marrëdhënia e mirë e shqiptarit me golin. Pas çmendurisë në Kupë ku shënoi 6 gola dhe shkroi emrin e tij mes legjendave të futbollit hungarez, Uzuni zhbllokohet edhe në kampionat. Ai ishte protagonist kryesor në fitoren 3-1 të Ferencvaroshit ndaj Ujpestit. Uzuni arriti të fitonte një 11-metërsh, të jepte një asist dhe të shënonte dy gola, një prej të cilit u anulua në minutën e 81-të nga sistemi VAR për pozicion të parregullt. Nuk mbaron këtu, gjashtë minuta më vonë Uzuni gjen rrugën e rrjetës dhe i fal qetësinë skuadrës së tij. Sezoni i ri sapo ka nisur dhe ky është goli i 8-të për shqiptarin që deri tani po tregon një formë të shkëlqyer.
Lindon Selahi - Mesfushori i Kombëtares e ka bërë “sefte” në kampionatin kroat, teksa ka gjetur golin e parë me fanellën e Rijekës. Pas një aksioni model, në të 46’-ën shqiptari tundi rrjetën në përballjen ndaj Goricës së Albi Dokës, duke vendosur baraspeshën e përkohshme 2-2. Si Selahi, ashtu edhe Doka u aktivizuan titullarë në këtë përballje, ndërkohë që ish-mbrojtësi i Tiranës në të 57’-ën shkaktoi penallti pasi preku topin me dorë.
Armando Broja - Vazhdon të mos i besohet ende vendi i titullarit në kampionatin e magjishëm anglez. Sulmuesi aktivizohet përsëri në pjesën e dytë, konkretisht në minutën e 64t kur rezultati ishte 0-1. Broja nuk ka arritur ta ndryshojë fatin e takimit për Sauthemptonin, por në ato pak minuta ka luajtur mirë dhe ka lënë shenjë duke dhuruar një vrapim prej shumë metrash dhe duke i rrëmbyer topin mbrojtësit të fundit, por ishte portieri që doli në kohë dhe i hoqi mundësinë e një goli fantastik.