Soreca takon Manjën: Konsolidim të Reformës në Drejtësi
“Efikasiteti i gjykatave, pavarësia e magjistratëve, qëllimet kryesore”
Ambasadori i Bashkimit Europian në Tiranë, Luigi Soreca, kërkoi konsolidim të Reformës në Drejtësi dhe efikasitet të gjykatave. Soreca zhvilloi dje një takim me ministrin e ri të Drejtësisë, Ulsi Manja. Përmes një mesazhi në “Twitter”, Soreca ka bërë me dije se fokusi i diskutimit ishte Reforma në Drejtësi. Sipas tij, efikasiteti i gjykatave është qëllim kryesor. “Sot takova ministrin e sapoemëruar të Drejtësisë, z. Ulsi Manja. Reforma e Drejtësisë duhet të konsolidohet tani dhe efikasiteti i gjykatave dhe pavarësia e magjistratëve janë qëllimet kryesore. Ne diskutuam rolin e institucioneve të verifikimit dhe të Shkollës së Magjistraturës, si dhe punën e vazhdueshme në hartën gjyqësore. Reforma e sistemit të drejtësisë vazhdon me mbështetjen e Bashkimit Europian”, shkruan Soreca. Ministri i Drejtësisë, Ulsi Manja, zhvilloi dje një takim me ambasadoren e Shteteve të Bashkuara të Amerikës,
Yuri Kim. Pas takimit, ai u shpreh se “mbështetja e Shteteve të Bashkuara të Amerikës është e paçmueshme për Shqipërinë”. “Me ambasadoren amerikane Kim biseduam dhe ndamë së bashku idetë dhe objektivat për të vijuar më tej punën pa kthim, për zbatimin e plotë të Reformës në Drejtësi në të gjithë përbërësit e saj”, theksoi Manja. “Pengesat e vogla nga çdo anë të vijnë, as nuk do të pengojnë e as nuk do të ndalojnë bashkëpunimin tonë maksimal në luftën ndaj korrupsionit, krimit dhe pandëshkueshmërisë në Shqipëri!”, u shpreh ai. Nga foltorja e Parlamentit Ulsi Manja, si ministër i Drejtësisë, kërkoi votat e opozitës për këtë ndryshim, për t’i dhënë KPK-së afat veprimi deri në përfundimin e vetingut të 370 gjyqtarëve dhe prokurorëve në listë për t’u vetuar. Manja tha se “ne do të kërkojmë edhe konsensusin e opozitës që mandati i KPK-së dhe i KP-së të zgjatet deri në përfundim të procesit të vetingut, pra deri në vetimin e plotë të të gjitha subjekteve të shortuara, për t’iu nënshtruar procesit të rivlerësimit kalimtar të prokurorëve dhe gjyqtarëve në Republikën e Shqipërisë”, tha Manja. “Ky është mandat kushtetues dhe sigurisht zgjatja e mandatit kërkon ndërhyrje në Kushtetutë. Ne nuk i kemi votat e nevojshme për të ndërhyrë në Kushtetutë për ta zgjatur mandatin e KPKsë dhe KP-së do të kërkojmë konsensusin e opozitës, sepse për ne mbarimi me sukses i procesit të vetingut si një nga shtyllat kryesore në sistemin e drejtësisë, është garanci për të pasur një sistem drejtësie të konsoliduar”, tha në fund ministri Manja.
SORECA: Reforma e Drejtësisë duhet të konsolidohet tani dhe efikasiteti i gjykatave dhe pavarësia e magjistratëve janë qëllimet kryesore