Manastirliu: Të gatshëm për dozën e tretë
“Arrijmë në 3 milionë doza vaksine brenda 2021”
Shumë shpejt në vendin tonë mund të nis aplikimin doza përforcuese e vaksinës apo doza e tretë. Ministrja e Shëndetësisë, Ogerta Manastirliu, e la të hapur këtë si mundësi kur tha se përmes kontratave të reja të arritura me kompanitë e vaksinave, sigurohet jo vetëm vazhdimësia e vaksinimit por garantohet edhe sasia e nevojshme për çdo vendim të komitetit në raport me dozat e treta. “Sigurisht, kjo është një kontratë e cila do të na japë mundësinë jo vetëm për të siguruar vazhdimësinë e vaksinimit për popullatën +18 vjeç, por është edhe pararendje, për çdo vendim të Komitetit të Vaksinimit dhe Komitetit të Imunizimit në raport me dozat e treta, të cilat disa vende i kanë filluar. Kjo na jep një garanci më shumë në disponibilitetin e vaksinave”. Sipas Manastirliut, fondi i vënë në dispozicion nga qeveria për blerjen e vaksinave kap vlerën e 36 milionë dollarëve. Lidhur me ecurinë e vaksinimit, ministrja vuri në dukje se përqindja e popullatës së vaksinuar me një dozë sot është 44%, ndërkohë që përqindja e popullatës së vaksinuar me dy doza është drejt 36% e popullatës target +18 vjeç. Gjatë mbledhjes së Komisionit për Ekonominë dhe Financave për diskutimin e Aktit Normativ “Për miratimin tekstit të disa ndryshimeve në marrëveshjen për prodhimin dhe furnizimin nga dhe ndërmjet ‘Pfizer Export B.V’”,m e Shëndetësisë dhe Mbrojtjes Sociale, Ogerta Manastirliu, tha se deri në fund të këtij viti pritet të sigurohen gjithsej 3 milionë doza vaksine. Duke u ndalur në marrëveshjen e re me kompaninë “Pfizer”, Manastirliu tha se kontrata e re nuk ka asnjë ndryshim në çmim apo në kushtet të tjera. “Sa i përket marrëveshjes të cilën ne miratojmë sot, për këtë furnizim me 500,760 doza vaksine, qeveria ka miratuar edhe kryerjen e pagesës direkte për blerjen e këtyre vaksinave që i hap rrugë sigurisht edhe furnizimit tashmë me këto vaksina, sipas kalendarit të miratuar në këtë marrëveshje. Fakti që po sjellim një amendim të marrëveshjes së nënshkruar bëhet për arsye se kjo marrëveshje nuk ka ndryshime as kur flitet për ndryshime në çmim dhe për kushte të tjera të kontratës, por sepse vjen në një sasi plus”, deklaroi Manastirliu. Ndërkohë, përmes “COVAX”-it do të mbërrijnë edhe dy dërgesa të konsiderueshme të vaksinave brenda vitit. “Nëpërmjet instrumentit të “COVAX”-iy, tashmë jemi lajmëruar që në muajin tetor do të kemi edhe 188 mijë doza vaksine që mbërrijnë në Shqipëri nëpërmjet këtij instrumenti, ku Shqipëria ka parapaguar rreth 4 milionë dollarë. Ndërkohë që pritet që sërish nëpërmjet instrumentit “COVAX” të mbërrijnë dhe rreth 370 mijë vaksina, të cilat janë gjithashtu planifikuar për të mbërritur brenda këtij viti”, tha Manastirliu.