Çfarë do të thotë një Kryeministër Kishida për Japoninë?
(LDP) ka zgjedhur Fumio Kishida si kryetarin e saj të ri. Më 4 tetor, Parlamenti do ta zgjedhë atë si Kryeministrin e 100-të të Japonisë. Të dyja postet janë të lidhura tradicionalisht, kur LDP-ja mban shumicën në Parlament. Kishida pason Yoshihide Suga, i cili nuk kandidoi për rizgjedhje si drejtues partie pas kritikave të rënda për menaxhimin e pandemisë prej tij.
Kishida ia detyron fitoren e tij në zgjedhje “gardës së vjetër” të LDP-së, rreth ish-kreut të qeverisë Shinzo Abe dhe ministrit të Financave, Taro Aso, të cilët e mbështetën atë në prapaskenë për të parandaluar ministrin popullor të reformës dhe vaksinimit, Taro Kono. Sipas tyre, liberali i majtë 58-vjeçar i kushton shumë pak vëmendje disiplinës partiake dhe devijon shumë nga linja e tyre konservatore kombëtare.
Kishida 64-vjeçar, nga ana tjetër, i përket bazës së LDP, e cila është në pushtet në Japoni pothuajse pa ndërprerje që nga viti 1955. Ai vjen nga një dinasti politike; që babai dhe gjyshi i tij kanë qenë në Parlament. Ai vetë ka qenë anëtar i Parlamentit që nga viti 1993 dhe kryeson grupin e tij të partisë me 46 anëtarë. Kohët e fundit, ai ka qenë kryetar i Këshillit të Kërkimeve Politike, duke mbajtur një nga tri postet më të larta të partisë. Sidoqoftë, ai përfaqëson më shumë ndryshime se paraardhësi i tij Suga, i cili dha dorëheqjen.
LARGIMI NGA NEOLIBERALIZMI
Le të marrim për shembull politikën ekonomike: Kishida dëshiron të vazhdojë reformën ekonomike të ish-Kryeministrit Abe, i njohur si “Abenomics” me një politikë ekspansioniste monetare dhe fiskale. Ai gjithashtu dëshiron të krijojë një paketë masive stimuluese ekonomike në shumën prej 30 trilionë jenësh (231 miliardë euro) deri në fund të vitit për të kapërcyer pasojat ekonomike të pandemisë për bizneset. Por në të njëjtën kohë, në fushatën zgjedhore të brendshme të partisë, ai premtoi një largim nga neoliberalizmi i dy dekadave të fundit dhe njoftoi një “kapitalizëm të ri japonez”. “Vetëm rritja, derregullimi dhe reformat strukturore nuk çojnë në lumturi të vërtetë”, tha Kishida.
Prandaj, kreu i caktuar i qeverisë dëshiron të dyfishojë të ardhurat. Një nga propozimet e tij: Nëse kompanitë paguajnë paga më të larta, atyre do t’u jepet lehtësim tatimor në këmbim. Për më tepër, Kishida dëshiron të mbrojë më mirë ndërmarrjet e vogla dhe të mesme nga fuqia e korporatave në treg. “Kompanitë me shumë furnizues duhet të kenë mendjen”, tha Junichi Makino, kryeekonomist i shtëpisë së brokerimit, SMBC Nikko.
Idetë e tjera nga Kishida gjithashtu bëjnë thirrje për një politikë fiskale shumë ekspansive, duke përfshirë një fond universitar prej 10 trilionë jenësh (77 miliardë eurosh) për kërkimin dhe zhvillimin e teknologjisë dhe konceptin e tij të ardhshëm të një “të qytetitshtet kopsht dixhital”. Ky koncept synon rigjallërimin e rajoneve rurale duke investuar në teknologji të larta. Duke pasur parasysh neutralitetin e premtuar të klimës deri në vitin 2050, Kishida gjithashtu bën thirrje për një “vlerësim realist” për rifillimin dhe ndërtimin e reaktorëve të rinj bërthamorë.
“SIGURIA EKONOMIKE”
Midis viteve 2013 dhe 2017, Kishida shërbeu si ministër i Jashtëm dhe, për një kohë, ministër i Mbrojtjes. Fraksioni që ai drejton në LDP mbron Kushtetutën pacifiste të kombit dhe është kundër armatimit bërthamor të Japonisë. Vetë Kishida është nga Hiroshima dhe disa anëtarë të familjes së tij vdiqën kur në këtë qytet u hodh bomba atomike në vitin 1945. Në një nga librat e tij, ai mbron idenë e një botë pa armë bërthamore.
Por politika e jashtme këmbëngulëse e Kinës, sipas fjalëve të vetë Kishidës, ka ndezur një “alarm të fortë”, duke bërë që Tokio të bëjë aleancë me vendet që mendojnë ngjashëm si SHBA, Australia dhe India për t’iu kundërvënë ndikimit politik, ushtarak dhe ekonomik në rritje të Pekinit.
Megjithatë, fokusi i Kishidës nuk do të jetë vetëm në aftësinë ushtarake të Japonisë - edhe pse ai dëshiron të zgjerojë mbrojtjen me raketa të vendit - por edhe në sigurinë ekonomike, me theks në sigurimin e zinxhirëve të furnizimit për komponentë të rëndësishëm strategjikë siç janë gjysmëpërçuesit.