E infektuar prej një muaji, ndërron jetë 24-vjeçarja
Vetëm disa javë më parë solli në jetë foshnjën e saj të parë
Pas një beteje të gjatë me koronavirusin, ka ndërruar jetë 24vjeçarja Xheni Kaba. E reja ishte dërguar nga familjarët për mjekim të specializuar në Turqi, por nuk ka arritur të kthehet në jetë prej andej. Mësohet se 24vjeçarja ishte shtruar në Spitalin Infektiv në kryeqytetet në fund të muajit gusht, teksa ishte në muajin e shtatë të shtatzënisë. Disa ditë më pas, duke parë gjendjen e rënduar të saj, mjekët kanë bërë lindje të parakohshme, duke sjellë në jetë foshnjën përmes ndërhyrjes cezariane. Por, gjendja e së resë është komplikuar edhe më tej. Kjo bëri që familjarët e saj ta dërgonin në Turqi për mjekim të specializuar, por pavarësisht kësaj 24-vjeçarja nuk ia doli të fitojnë betejën me COVID-19.
FATALITETET Përgjatë kësaj jave, ka pasur një rritje të fataliteteve. Të enjten ndërroi jete edhe një 34vjeçare në muajin e 4-të shtatzënisë. Ndërsa në dy spitalet COVID, është rritur numri i pacientëve në terapi intensive. “Aktualisht, në spitalet COVID po marrin trajtim 161 pacientë, nga të cilët 19 janë në gjendje më të rënduar. Me gjithë përpjekjet e mjekëve, në 24 orët e fundit nuk e kanë fituar betejën me COVID-19 shtatë qytetarë: Një qytetare 47 vjeç nga Burreli, dy qytetarë nga Fieri 58 dhe 60 vjeç, një qytetar 61 vjeç nga Gjirokastra, një qytetar 63 vjeç nga Vlora, dy qytetarë nga Tirana 71 dhe 79 vjeç”, kanë bërë me dije autoritetet shëndetësore.
MANASTIRLIU Edhe pse numri i pacientëve të shtruar në spital ka ardhur në rënie, Ministria ka marrë masa për rihapjen e një strukture të tretë për trajtimin e të infektuarve. “Gati nëse do të kemi nevojë për të hapur COVID 4. Besoj që tashmë po merren masat e fundit për ta pasur në forcë në momentin që do të duhet dhe nëse do të ezaurohen të gjitha kapacitetet në dy spitalet aktuale, ku janë më shumë se 273 shtretër. Ndërkohë që këtu janë 108 shtretër pra në të gjithë këtë strukturë, ku edhe pajisjet sigurisht nuk mungojnë me të gjitha materialet. Salla e terapisë intensive është e pajisur me të gjitha pajisjet dhe materialet e nevojshme”, tha një ditë më parë ministrja Manastirliu, e cila po ashtu nuk përjashtoi përfshirjen në përballimin e situatës, edhe të kapaciteteve të spitalit “Shefqet Ndroqi”. Shefja e Shërbimit Infektiv, Najada Çomo, referuar raste shtrimeve në spital tha se, pjesa më e madhe janë të pavaksinuar. “Është më pak se 3% persona të vaksinuar, prej të cilëve një pjesë kanë bërë një ose dy doza. Por, pjesën më të madhe padyshim që janë personat e pavaksinuar, pra mbizotëron në mënyrë absolute”, tha Çomo. Lidhur me rastet e reja, të premten janë raportuar 647 persona të prekur nga 4139 testime të kryera duke e çuar në 9,499 numrin e pacientëve aktivë në të gjithë vendin.