Manja: Vetingu kërkon konsensusin e opozitës dhe bashkëpunimin
Ministri i Drejtësisë, Ulsi Manja, tha dje se Reforma në Drejtësi po jep rezultatet e saj. Pas konferencës “Roli i institucioneve vetëqeverisëse të drejtësisë” në një prononcim për mediat deklaroi se, së shpejti do të kemi një hartë të re gjyqësore. “Miratimi i hartës së re gjyqësore, si një mekanizëm efikas për riorganizimin e sistemit gjyqësor është një nga prioritetet e punës së Ministrisë së Drejtësisë. Natyrisht, ne e kemi bërë të qartë se harta është prerogativë e Këshillit të Lartë Gjyqësor. Në dijeninë time, dje ka pasur një rishikim të projektit të hartës së re gjyqësore në Këshillin e Lartë Gjyqësor, pra nga grupi i punës i ngritur nga KLGJ-ja, ku Ministria e Drejtësisë ka përfaqësuesit e saj në nivelin më të lartë dhe shumë shpejt harta e re gjyqësore do të vijë në Ministrinë e Drejtësisë pas rishikimit që është bërë dhe ne do të vijojmë më tej me hartën e re gjyqësore”, tha Manja. Ai tha se javën e ardhshme do të ketë informacione të reja për hartën e re gjyqësore. “Qëllimi im është të ofrojmë shërbime gjyqësore atje ku kemi gjykatat. Pra, thelbi i hartës që jemi duke diskutuar edhe me KLGJ është përqendrimi i trupës gjyqësore”, tha ai. Në lidhje me zgjatjen e mandatit të organeve të vetingut, Manja tha se “qëndrimi ynë si maxhorancë është i qartë. Ne do të propozojmë zgjatjen e afati të komisioneve të vetingut dhe këtu i referohem KPK-së, KP-së”. “Natyrisht, është një proces që kërkon ndërhyrje në Kushtetutë, ku pa diskutim është i nevojshëm dhe bashkëpunimi dhe konsensusi i opozitës. Procesi i vetingut do të duhet të përfundojë të organet e vetingut. Është e vërtetë që Kushtetuta ka parashikuar si mekanizëm që me mbarimin e afateve të Komisioneve të vetingut, funksionet e përhershme i marrin organet kushtetuese Këshilli i Lartë Gjyqësor, Këshilli i Lartë i Prokurorisë dhe SPAK, por që ky proces tashmë i konsoliduar në organet e vetingut do të duhet të përfundojë, aq më tepër që organet e reja të drejtësisë janë në konsolidim e sipër”, theksoi ai. Në lidhje me bashkëpunimin me opozitën, Manja tha se “jemi në konsultim të ngushtë me partnerët tanë ndërkombëtarë që kanë asistuar Reformën në Drejtësi që ditën e parë, SHBA dhe BE, kështu dhe në ditët në vijim do të kemi materializimin e nismës konkrete në Kuvend”.