Basha: Kriminelët në Ballkan ndihmohen nga autokratët për të ndarë pushtet

Kreu i PD: Për shumë vite është kërkuar stabiliteti në dëm të demokracisë, duke korrur si rezultat bjerrjen e të dyjave

Kryedemokrati Lulzim Basha ka ngritur alarmin në samitin e PPE-së se Ballkani Perëndimor është kthyer në kryqëzimin e rrugëve të kriminelëve dhe trafikantëve.

Shqetësimi i kreut të opozitës shkon më tej, kur thotë se kriminelët ndihmohen nga autokratët e Ballkanit, të cilët më pas shpërndajnë pushtet me ta. "Ne presim nga ky Samit i Ballkanit Perëndimor të adresojë pengesat në udhëtimin tonë drejt Europës. Përveç arenës mes përplasjesh gjeostrategjike, Ballkani është kthyer edhe në kryqëzimin e rrugëve të trafikantëve e kriminelëve, të cilat nxiten dhe lehtësohen nga autokratët e Ballkanit, që për pushtetin e tyre përdorin krimin e më pas e ndajnë pushtetin me ta", tha Lulzim Basha në Samitin e PPEsë për Ballkanin Perëndimor që po mbahet në Lubjanë.

ZGJEDHJET Më pas, në fjalën e tij, kreu i opozitës iu drejtua përfaqësuesve të Perëndimit se për shumë vite në Ballkanin Perëndimor është kërkuar stabilitet me argumentin që të mos dëmtohet demokracia, por që sipas liderit të selisë blu, ka ndodhur bumerang. "Për shumë vite është kërkuar stabiliteti në dëm të demokracisë, duke korrur si rezultat bjerrjen e të dyjave. Mjafton të shihni raportin e ODIHR-it, 5 rekomandimet prioritare, nëse hiqni emrin e Shqipërisë, do të mendoni se është raporti i zgjedhjeve të Bjellorusisë së Lukashenkos. Po ju përmend vetëm një frazë: 'Shteti duhet të garantojë lirinë dhe fshehtësinë e votës'. Lirinë dhe fshehtësinë e votës?! Në 2021-shin në Shqipëri, një vend anëtar i NATOS-s, kandidat për në BE, që pret Konferencën e Parë Ndërqeveritare… Ndaj në këtë proces, sinqeriteti dhe guximi janë thelbësorë. Guxim për të drejtuar gishtin ndaj veprimeve dhe autorëve që gërryejnë demokracinë, sundimin e ligjit dhe lirinë e medias. Duke mbajtur qëndrim, për të mos pranuar për vendet tona gjëra që nuk do t'i pranonit kurrë për zgjedhësit tuaj. Për këtë, unë besoj se rajoni ynë ka nevojë për më shumë mbështetje për sundimin e ligjit, më shumë ndihmë në luftën kundër korrupsionit dhe krimit të organizuar, më shumë mbështetje për zgjedhje të lira dhe të ndershme. Vetëm në këtë mënyrë ne mund të krijojmë, së bashku, më shumë mundësi për të rinjtë tanë dhe qytetarët tanë dhe të bëhemi udhëheqës të vërtetë për shpresat dhe aspiratat e tyre dhe jo shfrytëzues të frikës dhe anktheve të tyre", u shpreh kreu i PD-së, Lulzim Basha. APELI PËR KOSOVËN Ndërkohë, vetëm pak ditë pasi Serbia dhe Kosova arritën marrëveshjen e reciprocitetit për targat pas një tensioni që u krijua mes dy vendeve, kreu i PD-së, Lulzim Basha, shfrytëzoi rastin e fjalës së tij në samitin e PPE-së për t'i kërkuar BE-së që të investojë energjitë e saj për një marrëveshje përfundimtare mes Serbisë dhe Kosovës. "Është jetike për BEnë të përqendrojë energjinë e saj drejt marrëveshjes përfundimtare të njohjes reciproke midis Kosovës dhe Serbisë. Vetëm në këtë mënyrë do të hyjmë në një epokë të re të bashkëpunimit dhe zhvillimit. Ngjarjet e fundit në kufirin Kosovë-Serbi dhe në Mal të Zi tregojnë se sa e brishtë mbetet paqja dhe stabiliteti në këtë rajon. Reminishencat e një të kaluare jo shumë të largët, të përziera me interesa gjeostrategjike të fuqive joperëndimore, janë një fitil që mund të ndizet nga momenti në moment. Siç e dimë të gjithë, problemet e pazgjidhura shumë lehtë mund të kthehen në kriza. Kjo është arsyeja pse është jetike për BE-në që të përqendrojë energjinë e saj drejt marrëveshjes përfundimtare të njohjes reciproke midis Kosovës dhe Serbisë. Dhe për ta arritur këtë, njohja e Kosovës nga 5 shtetet anëtare të mbetura duhet së pari të përfundojë. Asnjë paralelizëm nuk mund të bëhet, asnjë argument nuk mund të justifikojë mosnjohjen e pavarësisë së Kosovës, përderisa Gjykata Ndërkombëtare e Drejtësisë e ka certifikuar atë", tha Lulzim Basha.