Kushtetuesja rrëzon pragun 1% për kandidatët e pavarur
“Fjalia e dytë e pikës 1, të nenit 162 të Kodit cenon të drejtën për t’u zgjedhur”
Gjykata Kushtetuese ka rrëzuar dje “pragun 1 për qind” në nivel kombëtar që duhet të arrijnë kandidatët e pavarur në zgjedhje. Gjykata ka pranuar pjesërisht kërkesën e kandidatit të pavarur, Elton Debreshi, i cili është shprehur se pragu prej 1 për qind është diskriminues. Sipas vendimit të Kushtetueses, pjesa që barazon kandidatët e propozuar nga zgjedhësit me kandidatët e propozuar nga partitë politike është e papajtueshme me Kushtetutën e Shqipërisë. Sipas përcaktimeve të Kodit Zgjedhor, të cilat u miratuan në mënyrë të njëanshme nga Partia Socialiste dhe Kuvendi me opozitën parlamentare në tetorin e vitit 2020, subjektet zgjedhore duhej të merrnin 1 për qind të votave në rang kombëtar, para se të fitojnë të drejtën të përfshihen në llogaritjen e mandateve. Elton Debreshi ka depozituar në Gjykatën Kushtetuese në prill të këtij viti, një kërkesë për shfuqizimin e pragut 1 për qind që duhet për t’u zgjedhur deputet, duke e quajtur diskriminues.
NJOFTIMI I GJYKATËS KUSHTETUESE:
Gjykata Kushtetuese e Republikës së Shqipërisë në seancën plenare publike të datës 28.09.2021 mori në shqyrtim çështjen me kërkues: Elton Debreshi, subjekt zgjedhor kandidat i propozuar nga zgjedhësit, me objekt: “Shfuqizimi i pikës 1 të nenit 162 të ligjit nr. 10019, datë 29.12.2008 Kodi Zgjedhor i Republikës së Shqipërisë”, të ndryshuar, si e papajtueshme me Kushtetutën e Republikën e Shqipërisë.
Në përfundim të shqyrtimit të kësaj çështjeje, Gjykata Kushtetuese arriti në përfundimin se pjesa e fjalisë së dytë, të pikës 1, të nenit 162 të Kodit Zgjedhor, që vendos për kandidatët e propozuar nga zgjedhësit kufizim të njëjtë me atë të kandidatëve të propozuar nga partitë politike, ose nga koalicion partish politike cenon të drejtën kushtetuese për t’u zgjedhur, në lidhje me parimin e barazisë në ligj dhe ndalimit të diskriminimit. Për këto arsye Gjykata Kushtetuese,
VENDOSI: -Pranimin pjesërisht të kërkesës.
– Shfuqizimin, si të papajtueshëm me Kushtetutën, të fjalisë së dytë, të pikës 1, të nenit 162 të Kodit Zgjedhor të ndryshuar, në pjesën që barazon kandidatët e propozuar nga zgjedhësit me kandidatët e propozuar nga partitë politike, ose nga koalicion partish politike. Vendimi përfundimtar i arsyetuar do të shpallet brenda afateve të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar.