RRITJA E ÇMIMEVE TË PRODUKTEVE USHQIMORE
Prej muajit shtator konsumatorët shqiptarë po përballen me çmime më të larta për produktet ushqimore. Kështu, çmimi i bukës është rritur me 20 lekë, ndërsa më shtrenjtë sot blihet po ashtu një kilogram mish, një litër vaj, një pako makarona, një kilogram oriz, të cilat kanë pësuar një rritje e cila varion nga 10 lekë deri në 50 lekë. Më shtrenjtë po ashtu blihet edhe qumështi si edhe nënproduktet e tij, duke nisur nga djathi, gjiza, gjalpi e kosi. Qytetarët i druhen faktit që kriza energjetike e paralajmëruar nga Kryeministri Rama do të pasohet nga rritja e mëtejshme e çmimeve për produktet bazë. Në kushtet kur niveli i pagave mbetet në stanjacion, një gjë e tillë do të ishte e papërballueshme për pjesën dërrmuese të familjeve shqiptare.
Rritja në javët e fundit e çmimit të produkteve ushqimore dhe paralajmërimi për një krizë të energjisë elektrike, shoqëruar me rritjen e çmimit të saj, bëri bashkë dje në një protestë përpara ndërtesës së Bashkisë së Shkodrës disa dhjetëra qytetarë, pjesa më e madhe pensionistë.
Sipas Zef Bregut, jetesa tashmë është bërë e papërballueshme. “Kjo rritje shumë e madhe e çmimeve, duke filluar nga buka, për ne si pensionistë është shumë e rëndë. Pensionet janë të ulëta, çmimet po dyfishohen, pra kjo është diçka që ne nuk mund ta përballojmë”, thotë ai. Vitore Çinari thotë se ka punuar 25 vite në fabrikën e cigareve dhe pensioni i saj është vetëm 1100 lekë. Ajo thotë se janë vështirësitë e jetesës që e kanë detyruar të dalë në protestë. “Ka plot që kalojnë kështu me skamje dhe detyrohen të heshtin sepse u vjen turp të dalin. Unë nuk kam turp, se me kaq jetoj. Pse duhet të pres lëmoshë nga fëmijët? Kam jetuar këtu, kam derdhur djersë, kam punuar në aksione, hekurudha, gjithkund ku na ka dërguar shteti. Dhe kur vjen fundi, jetojmë pa dinjitet”, thotë ajo. Protesta e djeshme, shkruan “Zëri Amerikës”, kundër rritjes së çmimeve mbështetet nga Bashkimi i Sindikatave të Pavarura të Shkodrës, drejtuesi i të cilit, Albert Tukaj, thotë se nivelit të lartë të papunësisë në Shkodër, që ka arritur në 60 për qind, tashmë do t’i shtohet edhe rritja e çmimeve të pjesës më të madhe të artikujve të domosdoshëm për jetesën e përditshme. “Sot protestojmë kundër rritjes se çmimit të bukës, kundër rritjes së çmimit të karburantit, që janë frymëmarrja e ekonomisë shqiptare. Protestojmë për biznesin e vogël kundër fiskalizimit. Apo e thënë ndryshe, kërkojmë nga qeveria shqiptare që për 5 vjet biznesi i vogël mos të trajtohet me fiskalizimin e ri, për shkak se sot ai doli nga lufta pandemike dhe biznesi i vogël është biznes social”. Ekspertët e ekonomisë kanë bërë të ditur se rritja e çmimit të grurit, karburanteve dhe energjisë elektrike do të ndikojë në rritjen e çmimit të të gjitha produkteve që konsumojnë qytetarët, duke vështirësuar edhe më tej gjendjen e tyre ekonomike. Ndërkohë sot është paralajmëruar një tjetër protestë kundër rritjes së çmimeve për produktet e shportës dhe jo vetëm, e cila do të mbahet në orën 17:00 përpara ambienteve të Kryeministrisë.