Shkollat me dy turne, qeveria flet për laboratorë informatike
Mbipopullimi i klasave, Rama: “Mund të flasim për cilësi, jo nevoja mbijetese. Vitin tjetër vitalizojmë hapësirat e mësimit të Informatikës”
Përpara se e besuara e Kryeministrit për rininë, Bora Muzhaqi, të hartojë strategjinë kombëtare që synon të mbajë në Shqipëri të rinjtë, duke u ofruar alternativa, u zhvillua një takim me gjimnazistët e vendit për të marrë një reagim se çfarë i shqetëson ata më së shumti.
Në takimin e gjatë kreu i qeverisë, Edi Rama, udhëton shumë në kohë, si vite përpara, por edhe në vijim. Që nga tentativa për të rikthyer në shkolla zejtarinë e prodhimin e deri te krijimi i klubeve sportive në shkolla dhe teknologjia e informacionit që vetëm disa shkolla në qendër të qyteteve e kanë luksin të jenë të pajisura me laboratorë, pa folur nëse janë apo jo funksionalë. I gjithë ky diskurs ndodh në një kohë që nxënësit nuk kanë nevojën më bazike, ambientet për të mësuar. Po bëhen dy vite nga tërmeti dhe në arsim është e njëjta panoramë. Nxënës që vijojnë të mësojnë deri në orët e vona të mbrëmjes në shkollën fqinje. Rikthimi i orëve normale nuk e ka ndrequr aspak situatën. Katër turnet janë kthyer në dy të tilla, të mbingarkuara tej kapaciteteve dhe me orë të plota deri në të errët. Asnjë fjalë për to. Vetëm në Tiranë janë 23 shkolla të reja për t’u rindërtuar nga e para pas dëmeve të tërmetit, por teksa në disa prej tyre ka nisur puna, ka ende shkolla në të cilat nuk është dhënë ende vendimi për prishje. Një prej tyre është “Asim Vokshi”, që ndonëse pozicionohet shumë pranë qendrës së kryeqytetit, ende nuk është gjendur zgjidhja për të. Në të njëjtat kushte është edhe gjysma e godinës së “Emin Durakut”, “Xhezmi Dellit”, “Musine Kokalarit” e shumë të tjera.
LABORATORËT Gjithë sa u fol në përballjen e Kryeministrit dhe ministres së Shtetit për Rininë dhe Fëmijët ishin plane. Si ai për rivitalizimin e hapësirave të mësimit të informatikës, që sipas Ramës, nuk mund të bëhet më vetëm në libra, siç është bërë së paku në dy mandatet paraardhëse, por në mjedise të denja laboratorike. “Kemi vendosur objektivat tona edhe në programin e ri të qeverisë, duke filluar nga domosdoshmëria për ta transformuar krejtësisht mësimin e informatikës. Jam 100% dakord me ata të cilët e sollën këtu në vëmendje faktin që laboratorët e informatikës, edhe aty ku janë, edhe aty ku kanë mjete, lënë shumë për të dëshiruar, jo vetëm nga pikëpamja e aksesit në ato mjete nga të gjithë nxënësit, por edhe nga pikëpamja e cilësisë së dhënies së mësimit.
Nga ana tjetër, është absolutisht e pakuptueshme që informatika të bëhet teorike dhe praktikisht të mos jepen dijet që i shoqërojnë teoritë në nivelin praktik. Faktikisht, nxënësi që i merr ato dije mund t’i përsërisë ato përmendësh, por nuk ka mësuar informatikë dhe nuk është në gjendje që të përdorë kompjuterin as për nevojat e veta e jo më për të bërë më shumë se kaq. Fatmirësisht, teknologjia avancon çdo ditë, kështu që, besoj se plani që kemi për t’i rivitalizuar komplet hapësirat e mësimit të informatikës do jetë efikas dhe do e vëmë në jetë, me siguri, duke filluar nga viti i ardhshëm, shpresoj më shpejt sesa fillimi vitit tjetër shkollor”, artikuloi Rama, duke i vendosur vetes dhe një afat tepër ambicioz për përmbushjen e këtij veprimi. Jo më pak shqetësim përbën edhe mënyra se si ato mirëmbahen. Dhe kur thotë këtë, e ka fjalën në ato pak shkolla të pajisura me tenderime, për të cilat gara jo gjithnjë bëhet transparente. “Kemi bërë shumë investime për infrastrukturën shkollore, kemi bërë investime për laboratorët, por ajo që më shqetëson është që njësoj siç ndodh me klasat e informatikës, bëhet investimi i parë, blihen ato kompjuterët që vendosen aty për momentin e parë dhe pastaj vazhdimësia nuk garantohet. E dëgjova nga dy, tre këtu që në laboratorët e kimisë apo laboratorë të tjerë, materialet për të vazhduar punën praktike në mënyrë konstante dhe të pandërprerë mungojnë. Kjo është përsëri problem i madh, sepse librat që ju merrni janë libra që përsëri e tha dikush prej jush shumë qartë, bazohen në një tjetër qasje në ndryshim nga librat që jepeshin dikur dhe si të tillë, janë libra që janë shumë të lidhur me orët e praktikës. Nëse ajo që ato libra shkruajnë dhe ajo që mësohet prej atyre librave teorikisht, nuk kombinohet me orët e praktikës ashtu siç duhet, me të njëjtën cilësi siç janë tekstet e ‘Cambridge’-it dhe ‘Oxford’it, atëherë problemi bëhet serioz”, vuri në dukje shefi i Kabinetit Qeveritar. Rama e konsideroi këtë dëgjesë shumë nxitëse për të marrë në konsideratë edhe gjëra që mund të duken të vogla, por që në jetën e përditshme të çdo nxënësi kanë peshën e tyre. Përtej strategjisë që është një dokument me një horizont disavjeçar, Rama tha se “ky proces na vlen shumë edhe për të adresuar çështje imediate, ose të tjera që mund të adresohen në periudha afatmesme”, duke anashkaluar kështu procesin e rindërtimit të shkollave.