Alizoti: Rama ka lidhje biologjike me Partinë e Punës
“Kur ne vuanim burgjeve, i biri i Kristaq Ramës dhe nipi i Kolekës, bridhte në rrugët e Bllokut”
Deputeti i Partisë Demokratike, Tomor Alizoti, deklaroi se Kryeministri Edi Rama ka një lidhje biologjike me Partinë e Punës, pasi është djali i Kristaq Ramës dhe nip i Spiro Kolekës.
Në një dalje për media nga ambientet e jashtme të Parlamentit, Alizoti iu përgjigj deklaratës së Kryeministrit Rama se deputetët e PD-së me qëndrimet e tyre, duken si mbeturina të Partisë së Punës. Gjithashtu, deputeti i PD-së u shpreh se kur demokratët vuanin burgjeve të diktaturë, Rama bridhte në rrugët e Bllokut me çorape të kuqe. “Më ngacmoi deklarata e Kryeministrit, i cili tha se “PD-ja ka marrë tiparet e Partisë së Punës”. Ca gjëra mund të qëndrojmë dhe ca gjëra jo. Njeriu që nga ana biologjike ka prejardhje të një xhelati, i biri i Kristaq Ramës dhe nipi i Kolekës, bridhte në rrugët e Bllokut, kur ne vuanim burgjeve, dhe vishte çorapet e kuqe. Partinë e Punës e ka njohur ai më mirë se kurrë. Ai duhet të jetë krenar që është pinjoll i Partisë së Punës. Ai foli për veten e tij, Partia e Punës është Kristaq Rama dhe Spiro Koleka. Ai ka ikur të shëtisë, dhe të merret me punë boshe. I vetmi individ është se i dalin shokët në televizion dhe i bëjnë moral”, pohoi deputeti demokrat. Për sa i përket protestave në lidhje me rritjen e çmimeve, Alizoti u shfaq përkrahës i tyre dhe theksoi se Shqipëria nuk duhet të rreshti kurrë duke bërë protesta. “Unë flas si Alizoti dhe si pjesë e PD-së. Si Alizot, Shqipëria nuk duhet të rresht për të bërë protesta. Populli shqiptar është i vetmi popull në Ballkan që vuan për të rritur fëmijët. Ky është një popull i vuajtur. Unë jam për protestë maksimale nga ana e PD-së për këtë problem”, tha ai. Më herët, Rama tha në Kuvend se: “Ju partia e qendrës së djathtë, e liberalizimit të tregut, po mos ju njohësh mendon se jeni mbeturina të Partisë së Punës. Konceptet tuaja janë mbeturina të sistemit të vjetër”.