Ardi Veliu: Të shurdhuarit nga kapja e një ton kokaine duan të na hedhin baltë
Ardi Veliu ka dorëzuar dje detyrën si drejtor i Përgjithshëm i Policisë së Shtetit ku vendin e tij tashmë e ka zënë Gledis Nano. Gjatë ceremonisë së prezantimit të drejtorit të ri, Veliu ka lartësuar punën e Policisë së Shtetit në 4 vitet e fundit duke u shprehur se është më e mirë se më parë. Ai u shpreh se pavarësisht se të verbuarit nga 20-fishimi i çmimit të kanabisit apo të shurdhuarit nga kapja e një ton kokainë duan të hedhin baltë mbi punën e efektivëve të Policisë, sërish Policia e Shtetit është më mirë se dje. “Ka qenë një detyrë shumë e rëndësishme dhe jam përpjekur të bëj më të mirën. Në 35 vitet e mia jam brumosur dhe edukuar t’i shërbej vendit tim. Çdo ditë të detyrës sime jam mbështetur në tri shtylla kryesore, që kanë qenë çdo ditë në vlerësimin tim, si ndershmëria, përkushtimi dhe humanizmi. Sot Policia e Shtetit është më mirë se dje. Falë kësaj pune, ju kolegë, së bashku, përballuam sfidat e tërmetit të 2019-ës, nga fillimi në fund. Së bashku arritëm të menaxhonim qindra tubime, të cilat u shoqëruan me lëndime të 67 efektivëve. Jeni ju kolegë që së bashku me mua arritëm të menaxhonim situatën e pandemisë. Jam krenar të dorëzoj detyrën si drejtor i Përgjithshëm i Policisë së Shtetit. Dua të falënderoj Kryeministrin Rama, 3 ish-ministrat e Brendshëm dhe falënderimi kryesor është për ju të dashur kolegë. Policia e Shtetit është shumë herë më e mirë se dje, pavarësisht se të verbuarit nga 20-fishimi i çmimit të kanabisit në vendin tonë apo të shurdhuar nga 1 ton kokainë e bllokuar nga ju të dashur kolegë. Kërkojnë të hedhin baltë mbi djersën tuaj. Falënderoj bashkëshorten dhe dy fëmijët, të cilët ma kanë bërë më të lehtë detyrën. Ju falënderoj pa masë për ndihmën që më keni dhënë dhe i uroj suksese drejtor Gledisit, shumë fat!”, tha ai.