Franca do të qëndrojë krah Greqisë në rast kërcënimi
Reagon Turqia: Politikë problematike që do kërcënojë paqen
Ligjvënësit grekë ratifikuan të enjten një marrëveshje të re të mbrojtjes midis Greqisë dhe Francës që do t’i lejojë ata të vijnë në ndihmë të njëri-tjetrit në rast të një kërcënimi të jashtëm.
Konflikti më aktual i Greqisë është ai me Turqinë dhe pakti ka nxitur tensione të mëtejshme. Pakti strategjik i bashkëpunimit ushtarak dhe mbrojtës midis dy aleatëve të NATO-s u arrit muajin e kaluar dhe përfshin një porosi për tri fregata franceze me vlerë rreth 3 miliardë euro. Athina kishte porositur tashmë 24 avionë luftarakë të prodhuar nga “Dassault” këtë vit. Parlamenti me 300 vende e miratoi marrëveshjen me 191 vota pro dhe 109 kundër. Partia e majtë opozitare, Syriza, votoi kundër marrëveshjes. “Për herë të parë është përcaktuar qartë se do të ketë ndihmë ushtarake në rast se një palë e tretë sulmon njërin nga të dy shtetet”, u tha Kryeministri Kyraikos Mitsotakis ligjvënësve grekë para votimit. “Dhe ne të gjithë e dimë kush po e kërcënon me një ‘casus belli’ (shkak për luftë) në Mesdhe”, shtoi ai, duke iu referuar qartë Turqisë. Të gjithë aleatëve të NATO-s u kërkohet të vijnë në ndihmë të një shteti anëtar që pëson agresion, por tensionet dekadëshe midis Athinës dhe Ankarasë ndërlikohen nga fakti se Turqia është gjithashtu anëtare e aleancës Atlantike.
Greqia dhe Turqia aktualisht janë në mosmarrëveshje mbi shtrirjen kontinentale dhe kufijtë e tyre detarë, një fakt që ka penguar çdo zgjerim nga ana e Athinës të ujërave të saj territorial në 19 kilometra në Egje. Turqia, e cila shtrihet në lindje të Greqisë, thotë se një lëvizje e tillë nga Athina do të ishte një “casus belli”. Disa ishuj grekë shtrihen më pak se 12 milje nga bregu perëndimor i Turqisë.
Sipas “Reuters”, pakti Athinë-Paris e ka zemëruar Ankaranë, ku zyrtarët, në një deklaratë më 1 tetor, thanë se “zona maksimale e juridiksionit detar të Greqisë dhe pretendimet për hapësirën ajrore kombëtare” ishin në kundërshtim me ligjin ndërkombëtar dhe se do të forconte vendosmërinë e Turqisë për të mbrojtur të drejtat e saj në rajon. “Politika e armatimit të Greqisë, si dhe izolimi dhe tjetërsimi i Turqisë, në vend të bashkëpunimit, është një politikë problematike, e cila do të kërcënojë paqen dhe stabilitetin rajonal dhe do të minojë jo vetëm vetveten, por edhe BE-në, në të cilën Greqia është anëtare”, tha zëdhënësi i Ministrisë, Tanju Bilgiç.
Zyrtarët francezë kanë theksuar se marrëveshja nuk synonte Turqinë dhe se ajo ishte plotësisht në përputhje me NATO-n. “Kjo nuk është një marrëveshje që drejtohet kundër Turqisë apo dikujt tjetër, është një marrëveshje që është në përputhje me qëllimin tonë të përbashkët, Greqinë dhe Francën, për të forcuar sovranitetin evropian, përfshirë në Mesdheun Lindor, ku ne kemi interesa thelbësore”, u tha gazetarëve një zyrtar presidencial francez.