Emergjenca për energjinë, pezullohen investimet në KESH, OST, OSHT
Këshilli i Ministrave shpalli dje gjendjen e emergjencës për furnizimin e vendit me energji elektrike. Vendimi parashikon ngritjen e një grupi ndërinstitucional për menaxhimin e furnizimit me energji elektrike, në krye të të cilit do të jetë zëvendëskryeministri Arben Ahmetaj. Gjithashtu, plani parashikon pezullimin e investimeve nga ana e Shoqëritë KESH, sh.a., OST, sh.a., dhe OSHEE Group, sh.a. Sipas vendimit të qeverisë, gjendja e emergjencës në furnizimin me energji elektrike do të vijojë deri më deri më 15 prill 2022. “Qeveria vendosi: Shpalljen e gjendjes së emergjencës në furnizimin me energji elektrike. Ngritjen e grupit ndërinstitucional për menaxhimin e emergjencës në furnizimin me energji elektrike, që drejtohet nga Zëvendëskryeministri dhe ka në përbërje ministrin e Infrastrukturës dhe Energjisë, ministrin e Financave dhe Ekonomisë dhe çdo përfaqësues nga institucione të tjera, që vlerësohen të nevojshëm nga Zëvendëskryeministri. Shoqëritë KESH, sh.a., OST, sh.a., dhe OSHEE Group, sh.a., të pezullojnë planet e investimeve, përveç investimeve të domosdoshme për ushtrimin e veprimtarisë. Këto shoqëri të koordinojnë ushtrimin e aktivitetit, në përputhje me udhëzimet e ministrit të Infrastrukturës dhe Energjisë, me qëllim garantimin e pandërprerë të energjisë elektrike. Ngarkohet ministri i Financave dhe Ekonomisë që të sigurojë mekanizmat e duhur financiarë, me qëllim mundësimin e importit të energjisë për sigurimin e furnizimit të pandërprerë të energjisë elektrike. Gjendja e emergjencës në furnizimin me energji elektrike i shtrin efektet deri më 15 prill 2022. Ngarkohen zëvendëskryeministri, ministri i Infrastrukturës dhe Energjisë, ministri i Financave dhe Ekonomisë, KESH, sh.a., OST, sh.a., dhe OSHEE Group, sh.a., për zbatimin e këtij vendimi”, thuhet në vendimin e qeverisë. Ligji për sektorin e Energjisë Elektrike i lejon Këshillit të Ministrave të shpallë gjendjen e emergjencës në furnizimin me energji elektrike edhe në rast të mungesave afatgjata të burimeve parësore energjetike për prodhimin e energjisë elektrike. “Gjatë situatave emergjente, të licencuarit dhe klientët duhet të respektojnë kufizimet në përdorimin e energjisë elektrike. Ministri përgjegjës për Energjinë përcakton shtrirjen dhe mënyrën e kufizimit të furnizimit me energji elektrike. Kufizimet e furnizimit në situata të jashtëzakonshme bazohen në kritere të paracaktuara, që kanë të bëjnë me menaxhimin e disbalancave prej Operatorit të Sistemit të Transmetimit. Çdo masë mbrojtëse merret në konsultim të ngushtë me operatorët e sistemeve të transmetimit të vendeve ndërkufitare, duke respektuar marrëveshjet përkatëse dypalëshe, përfshirë edhe marrëveshjet për shkëmbimin e informacionit”, thuhet në nenin 90 të ligjit.