Basha kundërshton Ramën: S’është krizë energjetike, por keqmenaxhim e korrupsion

Skandali me naftën, kreu i PD: 30% e karburantit në Shqipëri hyn kontrabandë, duke iu shmangur detyrimeve financiare të shtetit

Shqipëria, sipas kryedemokratit Lulzim Basha, nuk po përballet me një krizë të përkohshme energjetike, por me keqmenaxhim dhe korrupsion me rezervat ujore. Përmes një konference për mediat pak orë pasi kreu i qeverisë, Edi Rama, shpalli gjendjen e emergjencës energjetike, kryeopozitari së bashku me ekspertët e tij argumentoi se përse Shqipëria nuk është në kushtet që është BE-ja dhe vendet e tjera sa i përket krizës energjetike. Fillimisht Basha akuzoi KESH-in dhe OSHEE-në se kanë blerë energji 10 milionë euro më shtrenjtë sesa ishte në bursë. Po ashtu, për herë të parë, kryedemokrati Basha denoncoi se në Shqipëri 30% e karburantit që konsumohet futet kontrabandë, duke iu shmangur detyrimeve financiare. Ndërkohë nuk munguan replikat me Kryeministrin, pasi ky i fundit e quajti planin e PD-së me 7 pika si planin e Sudes. Në kundërpërgjigje Basha u kujtoi shqiptarëve se Sudja ishte një zonjë që përmes një skeme mashtruese u merrte shqiptarëve lekët dhe nuk ua kthente më. Të njëjtën gjë po bën, sipas kryedemokratit Basha, Kryeministri Rama. Kreu i opozitës e përshkroi Suden e vitit 2021 si një njeri pa flokë dhe me mjekër. Ndërkohë, dy nënkryetarët e PD-së, Alfred Rrushaj dhe Jorida Tabaku, shpjeguan teknikisht se si kanë dështuar entet shqiptare në menaxhimin e rezervave energjetike dhe për masat që duhet të implementojë qeveria që të mos prekë ekonominë e shqiptarëve. Përmes një skeme që është në foton e mëposhtme, sipas Rrushajt, 2021-shi nuk është vit krize energjetike për Shqipërinë. Rrushaj tha se kaskada e Drinit ka prodhuar mjaftueshëm energji elektrike për të mbuluar nevojën e qytetarëve shqiptarë dhe bizneseve. Problemi, sipas Rrushajt, qëndron te KESH e OSHEE, që nuk kanë bërë një strategji që të kishin blerë energjinë më herët, kur çmimi ishte më i lirë, meqë Shqipëria nuk ka kapacitete rezervuese. Ndërkohë, nënkryetarja Tabaku tha se ulja e TVSH-së për energjinë elektrike dhe për ujin reflektohet menjëherë te çmimi përfundimtar për qytetarët. Ulja e TVSH-së, sipas saj, mund të ndikonte edhe te mallrat e shportës nëse institucionet nuk do të ishin të korruptuara.