Kush është Thoma Gëllçi, Rama: Nuk di asgjë për arrestimin

Në maj të vitit 2016 Thoma Gëllçi u zgjodh të ishte drejtuesi i ri i Radio Televizionit Publik Shqiptar. Këshilli Drejtues i RTSH-së vendosi për të zgjedhur drejtorin e Përgjithshëm, që do të zëvendësonte Martin Lekën. Pas votimit, me 7 vota pro, drejtori i ri i RTSH-së u zgjodh në atë kohë Thoma Gëllçi, i cili kandidonte në këtë post me Petrit Malajn. Ndërkohë Martin Leka, aktualisht drejtor i RTSH-së, u vendos që të mbante postin e zv.drejtorit të Përgjithshëm të RTSH-së. Thoma Gëllçi është një nga gazetarët që spikati në fund të viteve ‘80 dhe në fillim të viteve ‘90. Ai ka punuar fillimisht si gazetar në revistën humoristike “Hosteni”, më pas në gazetën “Zëri i Popullit”, të cilën e drejtoi për disa vite si kryeredaktor. Ai është themelues i gazetës “24 orë”. Po ashtu, ai ka punuar në struktura të larta të qeverisë Meta, në detyrën e drejtorit të Departamentit të Informacionit. Nënkryetari i Komisionit të Medias, që në atë kohë ishte Alfred Peza, shprehej 5 vite më parë se drejtori i ri i RTSH-së u zgjodh me konsensus. “Thoma Gëllçi mori 7 vota dhe Petrit Malaj 4 vota. Ai u zgjodh me shumicën e cilësuar të votave të anëtarëve të Këshillit Drejtues të RTSH-së, pavarësisht se për atë mjaftonte edhe shumica e thjeshtë e votave. Çka tregoi se ai ka marrë mbështetje edhe nga opozita”, shprehej Peza. I pyetur mbrëmë live në emisionin “Zonë e Lirë” nga gazetari Arian Çani, Kryeministri Edi Rama u shpreh se nuk dinte asgjë për arrestimin. Gëllçi u largua nga detyra në maj të këtij viti.