“Gjermania ende mban përgjegjësi për holokaustin”
Kancelarja gjermane, Angela Merkel, ka kryer vizitën e saj të fundit zyrtare në Izrael, ku tha gjatë takimit me Kryeministrin Naphtali Bennett se Gjermania ende mban përgjegjësi për holokaustin. “Holokausti është natyrisht një ngjarje unike për të cilën ne vazhdojmë të mbajmë përgjegjësi. Në çdo fazë të së kaluarës dhe të së ardhmes”, u tha Merkel gazetarëve të dielën. Bennett tha se Merkel, e cila do të tërhiqet nga politika pasi të përfundojnë bisedimet për koalicionin e ri qeveritar në Gjermani pas zgjedhjeve të shtatorit, është “busulla morale e të gjithë kontinentit europian”. Ai vlerësoi rolin e politikanes 67-vjeçare në konsolidimin e marrëdhënieve të veçanta midis dy vendeve bazuar në “plagën e thellë historike” të shkaktuar nga Gjermania naziste ndaj hebrenjve në Luftën e Dytë Botërore. Merkel u takua gjithashtu me anëtarët e koalicionit të qeverisë izraelite. Koalicioni qeverisës përbëhet nga gjithsej tetë parti të djathta dhe të majta të spektrit, dhe për herë të parë përfshin një parti arabe. Ish-Kryeministri konservator i krahut të djathtë, Benjamin Netanyahu, u largua nga detyra në qershor pas 13 vitesh ne qeverisje. Kancelarja Merkel zhvilloi bisedime me Presidentin Isaac Herzog dhe ministrin e Jashtëm, Yair Lapid, për herë të parë që kur qeveria dhe Presidenti filluan mandatet e tyre në qershor dhe korrik. Fokusi i bisedimeve pritet të jetë në programin bërthamor të Iranit, çështjen e pavarësisë së shtetit palestinez dhe çështjet bilaterale. Merkel e kishte planifikuar një vizitë në Izrael në fund të gushtit, por e shtyu për shkak të zhvillimit dramatik të situatës në Afganistan.