Presidentja e Tajvanit: S’i nënshtrohemi Kinës
Presidenti kinez, Xi Junping, u zotua për “përmbushjen e ribashkimit”
Në mes të rritjes së tensioneve në rajon, Presidentja Tsai Ing-wen tha se Tajvani nuk do t’i nënshtrohet presionit nga Kina dhe do të vazhdojë mënyrën e tij demokratike të jetës. “Sa më shumë që arrijmë, ne përballemi me presion më të madh nga Kina”, tha Tsai. Fjalimi i saj në Ditën Kombëtare të Tajvanit erdhi pasi Presidenti i Kinës, Xi Jingping, u zotua për “përmbushjen e ribashkimit”. Sipas BBC, Tajvani e konsideron veten shtet sovran, por Kina e sheh si provincë të shkëputur. Pekini nuk e ka përjashtuar mundësinë e përdorimit të forcës për të arritur bashkimin. Në ditët e fundit, Kina ka dërguar numër rekord të avionëve ushtarakë në zonën e mbrojtjes ajrore të Tajvanit, si paralajmërim ndaj Presidentes së Tajvanit. Tsai tha se Tajvani e ka “demokracinë linjë të parë të mbrojtjes”. Sipas saj, “ky ishull nuk mund të detyrohet që të shkojë në rrugën që Kina ka vendosur për ne”, për të cilën ajo tha se nuk ofron liri, demokraci apo sovranitet. Fluturimet e avionëve ushtarakë të Kinës në zonën e mbrojtjes ajrore të Tajvanit kanë ndikuar në sigurinë kombëtare dhe në sigurinë ajrore dhe situata konsiderohet “më komplekse dhe më fluide sesa që ka qenë ndonjëherë në 72 vjetët e fundit”. Tsai tha se Tajvani nuk do të veprojë me nxitim, por do të forcojë mbrojtjen e tij. Ajo ripërsëriti ofertën për bisedime me liderët kinezë në mënyrë të barabartë, një ofertë të cilën Pekini që e cilëson Tsain si “separatiste”, e ka refuzuar deri më tani. Tsai u rizgjodh me shumicë votash vitin e kaluar dhe ka premtuar se nuk do t’i nënshtrohet Pekinit. Të shtunën, më 9 tetor, Presidenti i Kinës, Xi Jingping, tha se bashki- mi duhet të arrihet në mënyrë paqësore, por paralajmëroi se populli kinez ka një traditë të lavdishme të kundërshtimit të separatizmit. “Detyra historike për të kompletuar ribashkimin duhet të përmbushet dhe definitivisht do të përmbushet”, tha Xi Jingping.