Broja për Botërorin, Shqipëria ëndërron
Fitore historikë në Budapest, Reja grumbullon rekord pikësh
Atë që Hungarisë nuk ia kishim bërë për 74 vite, ia bën një djalosh 20vjeçar nga Malësia e Madhe që ka lindur në Londër.
Në dy ndeshje në total kundër hungarezëve, ka luajtur gjithsej 36 minuta dhe ka arritur t’i shkaktojë dy humbje, t’i sigurojë gjashtë pikë Shqipërisë dhe ta mbajë në lojë për kualifikimin në Botëror. Armando Broja është futbollisti i momentit në Kombëtare. I aktivizuar në pjesën e dytë, gjatë një aksioni personal ai arrin të shënojë një gol ku i përfshin të gjitha, shpejtësi, forcë, driblim dhe gjuajtje. Shqipëria ka thyer një rekord pikësh, ku për herë të parë ka grumbulluar 15 pikë në grup dhe i afrohet edhe më shumë ëndrrës për të marrë pjesë në Kampionatin Botëror.
Ndeshja – Një vendosje defensive në fushë e të dyja ekipeve. Lojë e kontrolluar dhe e luftuar, e tregon edhe numri i faulleve të shkaktuar. Shqipëria krijon shumë raste, por Uzuni tregohet naiv përpara portës. Kuqezinjtë vinin me një freski të dukshme në fushë ku binte në sy edhe presingu i çdo lojtari, duke mos i dhënë mundësi Hungarisë që të merrte kontrollin e lojës.
PJESA E PARË Loja nis e qetë dhe e barabartë ku të dyja skuadrat po tregoheshin shumë të kujdesshme. Vihet re një presing nga ana e Shqipërisë. Në të 28-ën, pas një krosimi, Berisha përplaset me Gjimshitin ku ky i fundit dëmtohet në krah dhe detyrohet të dalë nga loja me barelë. Në fushë hyn Veseli. Lojë e fortë nga të dyja ekipet, Gjasula dhe Bare tregojnë dhëmbët në mesfushë. Në fundin e së parës, Uzuni shfrytëzon daljen lart të mbrojtësve hungarezë dhe del i vetëm me portierin, por nuk arrin të shënojë, gjithsesi, gjyqtari sinjalizon për ofsajd. Pjesa e parë mbyllet me një ekzekutim të një goditjeje dënimi nga Çekiçi i cili gjen murin mbrojtës dhe topi devijohet në goditje këndi.
PJESA E DYTË Në fushë hidhet Bajrami për Çekiçin. Reja i shton fantazi sulmit. E dyta fillon më një shans të mirë për hungarezët, por Salloi nuk arrin të gjuajë siç duhet duke e nxjerrë topin jashtë nga shumë afër portës. Shqipëria është më e freskët fizikisht dhe më e qartë.
Shansin më të mirë të lojës e ka Uzuni, i cili shërbehet shumë bukur nga Çakalleshi, beratasi i shkëputet mbrojtjes së Hungarisë dhe del i vetëm me Gulashin, por sërish nuk tregohet i saktë dhe gjen duart e portierit hungarez. Loja vazhdon dhe rastet i ka Shqipëria,
ku Trashi provon nga jashtë zone, por topi shkon mbi kuadrat, pak minuta më vonë është përsëri Trashi që kroson për Uzunin, i cili nuk ishte në ditën e tij më të mirë dhe nga shumë afër portës gjuan me kokë lehtë dhe topi neutralizohet nga Gulashi. Reja kryen edhe dy zëvendësime të tjera, në fushë Manaj për Çikalleshin dhe Broja për Uzunin. Dy sulmues për dy të tjerë, ndërkohë Rosi ndërron dy mesfushorë pasi mesfusha hungareze nuk po funksionon. Gjasula, gjithashtu, i afrohet golit me një tentativë nga jashtë zone. Minutat kalojnë dhe goli i parë ende nuk është shënuar. 15 minuta para përfundimit, Hungaria krijon shansin e vetëm të artë ku Atila Sazlai pas një krosimi në zonë devijon topin por ndalet nga shtylla, me fat Berisha. Goli vjen në të 80’-ën, ku Broja me një sprint në krahun e djathtë lë mbrapa kundërshtarët, hyn në driblim dhe me një të djathtë të fuqishme gjuan diagonal dhe gjen cepin e portës. Gol dhe Shqipëria është në avantazh. Në minutat e mbetura Hungaria nuk jep asnjë shkëndijë dhe ndeshja përfundon 0-1.