Mediat online, Rama: Liria e përhapjes ka minuar vetë lirinë
“E rëndësishme të mos kufizojmë lirinë e fjalës ndërkohë që përpiqemi të rregullojmë lirinë e përhapjes”
Kryeministri Rama ishte kritik dje për zhvillimin e mediave online pa një ligj të rregulluar, duke ngritur shqetësimin te lajmet e rreme dhe pasojat që vijnë prej tyre.
Rama, i cili ishte i pranishëm në konferencën e OSBEsë për Europën Juglindore me temë “Gazetari në kohë krizash”, foli për nevojën e një ligji, që sipas tij, do të rregullonte median online. “Nuk jam optimist duke parë atë që ndodh e nuk e kuptoj pse gazetat e TV duhet të rregullohen e janë të rregulluara dhe media online të mos mund të rregullohet. Unë dëgjoj lidhur me atë vetërregullim, por nuk jam i sigurt që vetërregullimi është përgjigjja përkundrejt shpejtësisë, se shpejtësia është përtej kufijve të imagjinatës së qenieve njerëzore, kur vjen fjala për vëllimin që duhet përpunuar për të parandaluar këtë përhapje apo idesë për të klikuar”, u shpreh Rama. “Më duhet të pranoj se nuk jam saktësisht njeriu i duhur për t’u ftuar në këto lloj takimesh për shkak të opinioneve të mia që njëfarësoj ndryshojnë nga ato që janë politikisht korrekte, kur bëhet fjalë jo për lirinë e medias, por për mënyrën se si në emër të kësaj lirie shumë gjëra që shkojnë kundër këtij koncepti të lirisë ndodhin. Po i referohem saktësisht përhapjes në internet të lajmeve të rreme, të sjelljeve që priren të jenë kundër lirisë së njerëzve të tjerë e priren të jenë kundër të drejtave të të tjerëve e të drejtës kur vjen në fjalën e gazetarisë që bazohet në kontrollin e fakteve dhe burimeve të qarta dhe mbështetet në ndjenjën e misionit për të përfaqësuar një fuqi të katërt reale për t’i trajtuar kësisoj fuqitë e tjera”, tha Rama. Sipas tij, “liria e përhapjes s’mund të jetë njësoj me lirinë e fjalës”. Duke vënë theksin te rëndësia që ka “të mbrojmë sa më shumë të jetë e mundur lirinë e fjalës të lulëzojë”, Rama tha se kjo nuk mjafton. Sipas Ramës, kur je politikan, zyrtar i zgjedhur, “mund të stërvitësh veten të mbijetosh e t’i thuash vetes që ja që kështu janë gjërat siç thotë legjendari Donald Trump se mënyrat për të kundërsulmuar janë mënyra potencialisht të rrezikshme për veten, se etiketohesh si njeri kundër lirisë, por kur sheh fëmijët e tu, familjen tënde, familje e fëmijë të të tjerëve që ngacmohen publikisht me gënjeshtra, shpifje e akuza të pabarabarta, çfarë bën? Shkon në gjykatë? Po pastaj? Duhen vite që gjykata të përfundojë çështjen, por ndërkohë dëmi është bërë”. Kryeministri theksoi se ende nuk e ka një përgjigje se si duhet rregulluar ndalja e shpifjeve dhe akuzave në median në internet. “Unë mendoj që shoqëritë tona e bota jonë është përballë sfidave të mëdha, por është ajo lloj sfide që duhet trajtuar në mënyra krijuese, pa harruar sa e rëndësishme është të mos kufizojmë lirinë e fjalës, ndërkohë që përpiqemi të rregullojmë lirinë e përhapjes”, tha Kryeministri.