Berisha sot në Kukës: Vetëm të bashkuar fitojmë
“Për një Parti Demokratike më të bashkuar, më të fortë, më të hapur”
Ish-Kryeministri Sali Berisha do të mbajë sot në Kukës takimin e radhës me demokratët. Përmes një njoftimi në “Facebook”, Berisha i ka ftuar demokratët e këtij qarku të marrin pjesë në takimin e tij që do të organizohet në orën 17:30 në Pallatin e Kulturës së qytetit. Ish-Kryeministri ka theksuar se “Foltorja” e tij me bazën e partisë po bëhet për një Parti Demokratike më të bashkuar, më të fortë, më të hapur. Sipas tij, arsyeja që ata duhet t’i bashkohen këtij takimi është se vetëm të bashkuar demokratët mund të fitojnë. “Ditën e martë, më datën 12 tetor, në orën 17:30, në Pallatin e Kulturës në Kukës do të mbahet ‘Foltorja: Për një Parti Demokratike më të bashkuar, më të fortë, më të hapur’. Ftoj demokratet dhe demokratët e Kukësit të marrin pjesë. Vetëm të bashkuar fitojmë!”, shkruan Berisha në “Facebook”. Takimi që pritet të mbahet sot në Kukës është i teti në radhë për ish-liderin e Partisë Demokratike. Pas Tiranë, Durrësit, Vlorës, Fierit, Shkodrës, Gjirokastrës dhe Elbasanit, Berisha
do të shkojë në një qytet bastion të së djathtës. Turi i takimeve me demokratët nga Berisha nisi pas përjashtimit të tij nga Grupi Parlamentar i PD-së, për të kundërshtuar vendimin personal të kryetarit Basha. Sipas ish-kreut të PD-së, ai nisi takimet me bazën për të rikthyer dinjitetin brenda Partisë Demokratike dhe këtë synon ta arrijë me mbledhjen e Kuvendit Kombëtar, për të cilin ka nisur mbledhjen e 1500 firmave të anëtarëve të tij. Berisha në deklaratat e tij nga “Foltoret” në qytetet e tjera e ka akuzuar kryetarin e PD-së Basha si peng të Kryeministrit Edi Rama.