KLGJ u heq 40% të pagës dy gjyqtarëve të Apelit të Vlorës për vendimin e vitit 2016
Dy gjyqtarë të Apelit të Vlorës do të mund të marrin 40% më pak të pagës së tyre për një periudhë 1-vjeçare. Këshilli i Lartë Gjyqësor shqyrtoi të hënën kërkesën e Inspektorit të Lartë të Drejtësisë për gjyqtarët Petrit Aliaj dhe Nazmi Troka. Hetimi ndaj tyre erdhi pas ndryshimit të një mase sigurie nga “Arrest me burg” në “Detyrim me paraqitje”. Aktualisht Aliaj është pezulluar nga detyra pasi është shkarkuar nga Komisioni i Pavarur i Kualifikimit. Këshilli i Lartë i Drejtësisë kishte arkivuar më herët ankimin para se të shkrihej, ndërsa KLGJ e rihapi sërish për shkak të ankimit nga ana e një qytetari viktimë e pengmarrjes. Ndërkohë, tre anëtarët e komisionit që kishte rihapur çështjen, Alban Toro, Fatmira Luli dhe Dritan Hallunaj, nuk ishin pjesë e shqyrtimit. Inspektori i Lartë i Drejtësisë, Artur Metani, tha se dy gjyqtarët kishin shkelur një dispozitë të Kodit të Procedurës Penale, e cila nuk kishte nevojë për interpretim. Metani vuri në dukje se vendimi i Gjykatës së Apelit në Vlorë për të lënë në fuqi masën e rishikuar të sigurisë ndaj një të akuzuari për heqje të paligjshme të lirisë në vitin 2016 ishte prishur nga Gjykata e Lartë, e cila po ashtu kishte shënuar tërheqje vëmendjeje për gjyqtarët. Sipas kryeinspektorit, vendimi i gjyqtarëve është një shkelje e pafalshme për magjistratë me atë eksperiencë. Vetë gjyqtarët kundërshtuan masën e marrë për heqjen e 40% të pagës. “Ne për atë të shkretë rrogë po punojmë”, tha midis të tjerash gjyqtari Aliaj. Pavarësisht pezullimit, gjyqtari merr pagën deri në vendimin përfundimtar të KPA-së. Ndërkohë Troka tha se masa disiplinore e kërkuar ishte joproporcionale.