Basha: PD s’do bunkerizohet përinteresatpersonaletëaskujt

Kreu i PD sqaron deklaratat për llumin e tranzicionit: Janë pushtetarët e korruptuar, oligarkët, por ka pasur edhe nga qeveria e PD

Pak më shumë se 1 muaj që nga dita e vështirë kur mori vendimin për pezullimin e Sali Berishës nga Grupi Parlamentar, Lulzim Basha doli nga pozicioni i mbrojtjes nga akuzat dhe nisi sulmin. Një ditë pasi shkarkoi deputetin Flamur Noka nga nënkryetar i Komisionit të Sigurisë dhe pasi e paralajmëroi për përjashtim, Basha u shpreh se edhe qeverisja e djathtë ka pasur njerëz të korruptuar që ai i quan “llumi” i shoqërisë, që vazhdojnë të aderojnë ende në PD. Pa përmendur emra, Basha tha se ata që kanë bërë korrupsion në kohën e qeverisjes së PD-së janë të shantazhuar nga Kryeministri aktual dhe punojnë aktualisht kundër interesave të demokratëve. Në një kohë kur ish-lideri demokrat Sali Berisha ka nisur mbledhjen e firmave për mbledhjen e Kuvendit Kombëtar, Basha tha dje se ai nuk do të lejojë askënd që të shkelmojë sakrificën e demokratëve. Ndërkohë tha se nuk do të lejojë askënd që të bunkerizojë PD-në për interesat personale të askujt, duke ndryshuar orientim e duke u bërë anti euro-atlantik.

PRONONCIMI I BASHËS Zoti Basha, dje keni përjashtuar deputetin Flamur Noka, pse e morët këtë vendim?

Zotit Noka i kam komunikuar shkarkimin e tij nga detyra si kryetar i Komisionit të Sigurisë, nuk e kam përjashtuar, por e kam paralajmëruar. Sepse nuk mundet që Partia Demokratike, që ka kundërshtar dhe armik, armikun e shqiptarëve, Edi Ramën dhe regjimin e tij, të mbahet peng nga sajesa, shpifje dhe keqinformime që na devijojnë nga detyra jonë kryesore si opozitë, që është lufta ndaj këtij regjimi në të gjitha format dhe mënyrat. Ne kemi lançuar iniciativa të shumta opozitare dhe do të lançojmë të tjera, për të zhbërë dhe gërryer themelet e regjimit Rama-Doshi-Rakipi. Dhe nuk mund të mbetemi peng i axhendave personale që kërkon ta kthejë Partinë Demokratike në një bunker për interesat personale të kujtdo qofshin këto. Prandaj, shtrembërime të tilla nuk do të tolerohen.

Zoti Basha, kush është llumi i qeverisjes gjatë qeverisjes së PD?

Kush është llumi i qeverisjes jua them unë tani. Pra, fraza të dala indirekt apo dhe këtu nga kjo foltore, nga këto shkallë të Partisë Demokratike që janë sajesa dhe shpifje, i shërbejnë Edi Ramës. Ato bëhen për të demoralizuar demokratët, ndërkohë që e gjithë beteja jonë është që mos të shkelmojmë mbi sakrificën e demokratëve për interesat e askujt. As interesat e mia, por edhe askujt tjetër. Kjo është arsyeja pse kam marrë një vendim më datën 9 shtator, në përputhje të plotë me përgjegjësitë dhe detyrat e kryetarit të Partisë Demokratike, për të shmangur çdo tollovitje dhe mundësi përçarjejeje që i shërben Edi Ramës, së cilës i fryn Edi Rama dhe regjimi i tij. Regjimi i Edi Ramës nuk përbëhet vetëm nga një grusht pushtetarësh të korruptuar që s’kanë të bëjnë fare me socialistët e thjeshtë, përbëhet dhe nga oligarkë, edhe nga pronarë mediash, edhe nga anëtarë të krimit të organizuar. Këta janë llumi i tranzicionit. 30 vite ndërrohen qeveritë, këta vetëm pasurohen, të tjerët vetëm varfërohen. Statusi juaj vetëm përkeqësohet dhe beteja e Partisë Demokratike, beteja ime në krye të Partisë Demokratike është me ta. Kështu që këtu kërkohet fokus, vëmendje, guxim dhe mençuri.

A ka pasur llum në kohën e qeverisjes së Partisë Demokratike?

Pa diskutim që po. Një pjesë e kemi pastruar kur kemi qenë në qeverisje, një pjesë nuk ia kemi dalë dot ta pastrojmë. Njerëz që sot kanë kontrata me koncesionet e inceneratorëve. Njerëz që sot hapin gropa në Tiranë për të pastruar paratë. Njerëz që kanë frikë nga gjëmat e tyre dhe që janë të shantazhueshëm nga Edi Rama, janë shantazhuar nga Edi Rama për t’i shërbyer Edi Ramës apo promovuar nga Edi Rama. Që këto para të vëna me praktika korruptive gjatë kohës që qeverisnim ne t’i përdorin për të shantazhuar demokratët në një rrugë pa krye dhe ndërkohë të akuzojnë kryetarin e Partisë Demokratike se po u bëka presion demokratëve, kjo është e patolerueshme. Ndaj, një gjë ta keni të qartë: Partia Demokratike është shpresa e vetme e këtij vendi. Është shpresa e vetme e shqiptarëve për ndryshim. Ky është një moment fondamental ndryshimi. Kushdo që mendon se do ta kthejë Partinë Demokratike në bunker për interesat e veta personale, që do të ndryshojë orientimin tonë euro-atlantik, apo që do të thyejë vendosmërinë time për t’u përballur me korrupsionin dhe krimin e organizuar, që përfaqëson Edi Rama dhe regjimi i tij dhe bishtat e korruptuar të ish-qeverisjes sonë, siç e thashë një, pjesë e kemi pastruar atëherë, por një pjesë kanë mbetur dhe demokratët e dinë fare mirë kush janë e ku janë e se çfarë pazaresh kanë bërë dhe bëjnë edhe sot me Edi Ramën. Kush mendon se do të thyejë vendosmërinë time në këtë drejtim, e ka shumë gabim. Nuk do të lejoj asgjë dhe askënd t’i bjerë me shkelmë sakrificës së demokratëve. Gjithçka që e kam bërë dhe po e bëjmë është në interesin më të mirë të demokratëve për të nderuar sakrificën e tyre, sepse po ju them dhe një herë, nuk ka shpresë tjetër për ndryshim për Shqipërinë dhe shqiptarët përveç Partisë Demokratike dhe demokratëve shqiptarë.