Berisha: Janë bërë mijëra firma për Kuvendin e PD
“Edi Rama, ndiqe foltoren, se është punë burrash, jo pengjesh”
Kukësi ishte stacioni i radhës ku u ndal ish-kryedemokrati Sali Berisha për të bashkëbiseduar me mbështetësit e tij. Demokratët kishin dalë për ta pritur në Rrugën e Kombit. Në “Foltoren” e Kukësit gjatë takimit të radhës me bazën, ish-Kryeministri Sali Berisha vuri theksin te ndryshimet në Statutin e kësaj force politike. Berisha dha dy opsione për të ndryshuar primaret. “Primaret janë që të zgjedhurit vendorë dhe qendrorë të Kukësit, Hasit, Tropojës, Gjirokastrës etj., t’i zgjedhë të gjithë anëtarësia e partisë, të dalë në krye ai që merr vota më shumë. Nëse doni ju, ky është njëri variant. I dyti i primareve është që të votoni jo vetëm ju, anëtarët, por edhe mbështetësit tanë, të vijnë të votojnë me ne për të përcaktuar kryetarin, deputetin, kryetarin e bashkisë. Për të përcaktuar këshilltarët. Ish-kryetari, kur e mori karrigen, kishte dhënë një urdhër, kishte përjashtuar nga gara të gjithë kryetarët e grupseksioneve. Këto marrin fund. Ish-kryetari ka vendosur në statik që kryetarët dhe sekretarët nëse kandidojnë, do të japin dorëheqjen, ndërsa ai vetë jo. Ai duhet të ikë sa më parë. Duhet të jenë të barabartë. E fortë është ajo forcë politike që gjithsecili ka një votë”, deklaroi Berisha. Gjithashtu, lideri historik u shpreh i hapur për krijimin e fraksioneve brenda partisë. “Cilido që është i aftë të krijojë fraksionin është i mirëpritur. Ne s’kemi frikë nga liria. Janë të mirëseardhur. Fraksionet kanë rregullat e tyre. Ne do ta bëjmë këtë parti shumë herë më demokratike. Do ta lartësojmë. Pas 30 vitesh jemi 30 herë më të zotë për ta shndërruar PD-në në shtëpinë e vërtetë të lirisë”, tha ai.
PARALAJMËRIMI NDAJ RAMËS Ndërkohë, ish-Kryeministri Sali Berisha në fjalën e tij pati një paralajmërim për Edi Ramën. Para demokratëve të Kukësit, Berisha i kërkoi Kryeministrit Rama që ta ndiqte, pasi sipas tij, është punë burrash dhe jo pengjesh, duke nënkuptuar Bashën. Në retorikën e tij që nga nisja e aksionit për të shkarkuar kryetarin e PD-së, Berisha i referohet Bashës dhe Ramës si “pengu dhe pengmarrësi”. “Përulem para qytetarëve të këtyre trevave që sot dhe në histori kanë qëndruar si viganë në anën e drejtë të saj. Kanë qëndruar të pamposhtur dhe janë më të vendosur se kurrë të rikthejnë fuqishëm PD-në si opozitë e pamposhtur e shqiptarëve. Ta kthejnë PD-në në rrugën e fitores së sigurt. Do t’i them zografit Bis, Edvin ndiqe këtë foltore. Kjo është punë burrash dhe jo punë pengjesh. Burrash dhe grash të lira dhe jo punë pengjesh”, deklaroi Berisha, ndërsa theksoi se janë mbledhur për t’i kthyer sovranitetin Partisë Demokratike. Daul- let me të cilën kuksianët e pritën, Berisha thotë se po bien për Edi Ramën, të cilit i bën thirrje t’i dëgjojë. “Dëgjoji ato daulle, po bien për ty. Mandatin s’e gëzon dot ti, se vetëm në zonat e tërmetit ke përdorur 160 milionë euro para për të blerë votat e njerëzve të varfër. Nuk e gëzon dot mandatin ti”, tha Berisha.