Gazetarët rikthehen në Kuvend pas 1 viti
“Kuvendi është i vendosur për garantimin e lirisë së shtypit, të plotë e pa pengesa”
Gazetarët do të rikthehen nesër në Kuvend dhe do të lejohen të ndjekin nga afër seancat plenare pas një viti mungesë për shkak të pandemisë Covid-19. Konferenca e Kryetarëve vendosi dje që prej seancës së të enjtes gazetarët do të vendosen në lozhat e sallës së seancës plenare. Ka kaluar më shumë se një vit qëkur gazetarët u detyruan të qëndrojnë jashtë sallës së seancave për shkak të pandemisë COVID-19. Parlamenti transmetohej me regji qendrore dhe gazetarët kishin mundësi për të ndjekur deputetët vetëm jashtë sallës. Më herët u vendos që gazetarët e vaksinuar ose me test PCR kundër COVID-19 mund të ndjekin komisionet parlamentare në Kryesinë e Kuvendit. “Lejimin e gazetarëve për të ndjekur fizikisht punimet e seancës plenare, në vendin e caktuar për ta në galerinë e sipërme të sallës plenare; si dhe marrjes së planeve nga operatorët për një periudhë kohore deri në 5 minuta nga hapja e seancës”, thuhet në njoftimin e Konferencës së Kryetarëve. Ndërkohë, Kryetarja e Kuvendit, Lindita Nikolla, priti në një takim Përfaqësuesen e OSBE-së për Lirinë në Media, Teresa Ribeiro, me të cilën bisedoi për mbrojtjen e lirisë së shtypit dhe medias. Në këtë Takim, Nikolla u shpreh se Shqipëria e konsideron lirinë e shtypit një shtyllë të demokracisë, ndërsa Kuvendi është i vendosur të garantojë lirinë e shtypit në mënyrë të plotë dhe pa pengesa. “Kuvendi është i vendosur për garantimin e lirisë së shtypit, në mënyrë të plotë e pa pengesa. Ne mbetemi gjithashtu të përkushtuar për të bashkëpunuar për të garantuar sigurinë e gazetarëve, si edhe qasjen në informacion të besueshëm, përmes shtypit të lirë, të pavarur, pluralist dhe të larmishëm, duke zbatuar standardet ndërkombëtare”, është shprehur Nikolla. Nga ana e saj, Përfaqësuesja e OSBEsë, Teresa Ribeiro, e uroi znj. Nikolla për zgjedhjen në detyrën e Kryetares së Kuvendit dhe vuri në dukje vullnetin e OSBE-së për të bashkëpunuar për përmirësimin e legjislacionit shqiptar për median, në zbatim të rekomandimeve të Komisionit të Venecias, standardeve të BE-së dhe OSBE-së, si edhe duke harmonizuar nevojën publike, legalitetin e proporcionalitetin, nëpërmjet një procesi gjithëpërfshirës.