“BSH do të punojë me standardet e BE”
Guvernatori Sejko: Ekonomia në fazë rimëkëmbjeje
Përkeqësimi i mundshëm i situatës së krijuar nga COVID-19, si edhe rritja e çmimeve në tregjet botërore mund të sjellin efekte negative në ecurinë e ekonomisë.
Por, sipas Guvernatorit të Bankës së Shqipërisë, Gent Sejko, efekti i goditjeve nga
rritja e çmimit të ushqimeve, të produkteve energjetike dhe të lëndëve të tjera në tregun botërore pritet të jetë kalimtar, megjithatë shtoi Sejko përbën një element shtesë pasigurie. Gjatë fjalës së mbajtur në konferencën e përbashkët me Fondin Monetar Ndërkombëtar Sejko u ndal në ecurinë ekonomike, duke vënë në dukje se të dhënat e përftuara gjatë nëntë muajve të parë të vitit, sugjerojnë se ekonomia është në një fazë rimëkëmbjeje. Pozitive po ashtu mbeten edhe projeksionet. “Në mungesë të goditjeve, aktiviteti ekonomik në vend pritet të vijojë të rritet gjatë viteve në vijim. Ndonëse ritmi i rritjes ekonomike pritet të vijë në ngadalësim, ai do të jenë i qëndrueshëm dhe i mjaftueshëm për të gjeneruar një shfrytëzim më të mirë të kapaciteteve prodhuese, rritje të punësimit e të pagave, si dhe kthimin e inflacionit në objektiv brenda vitit 2022”. Sipas INSTAT, në tremujorin e dytë të vitit ekonomia u rrit me 18 për qind. “Në këtë ecuri, një rol esencial pati stimuli i koordinuar fiskal dhe monetar, si dhe lehtësimi i përkohshëm dhe i targetuar i rregulloreve të funksionimit të sektorit bankar. Këto masa reduktuan barrën financiare të goditjes mbi bizneset dhe familjet shqiptare. Në këtë mënyrë, ato i dhanë frymëmarrje bizneseve në luftën e tyre për mbijetesë, frenuan rritjen e ndjeshme të papunësisë, si dhe krijuan premisa për një rimëkëmbje të shpejtë e të qëndrueshme të ekonomisë me përfundimin e pandemisë. Në të njëjtën linjë, reformat strukturore që kemi ndërmarrë gjatë viteve të fundit për rritjen e qëndrueshmërisë dhe të eficiencës së sistemit financiar, dhanë frytet e tyre. Ndër të tjera, këto reforma synuan dhe arritën një përdorim më të madh të monedhës kombëtare në transaksionet financiare, reduktimin e kredive me probleme, konsolidimin e sektorit bankar, si dhe përmirësimin e mëtejshëm të rregullimit dhe mbikëqyrjes së sistemit financiar në përgjithësi, dhe të sektorit bankar në veçanti”, tha më tej Guvernatori. Zgjerimi i kërkesës ka ndihmuar rikuperimin e prodhimit vendas, duke e sjellë atë pranë niveleve të para krizës, megjithatë, ky rikuperim sipas Guvernatorit të Bankës së Shqipërisë nuk është ende i plotë në tregun e punës, ku niveli i punësimit është poshtë vlerave të regjistruara përpara pandemisë dhe ku rritja e pagave është ende e pamjaftueshme për të kthyer inflacionin në objektiv. Në fund të fjalës së tij, Sejko tha se institucioni që ai drejton do të vijojë të punojë për përafrimin e kuadrit të saj mbikëqyrës e rregullator me standardet e Bashkimit Europian, si dhe në bashkëpunim me aktorët e tjerë institucionalë për zhvillimin e mëtejshëm të sistemit financiar dhe për përmirësimin e mëtejshëm të sistemit të pagesave.