Skandali me tunelin e Llogorasë, PD denoncon në SPAK ministren Balluku
Partia Demokratike njoftoi se do të depozitojë në SPAK një kallëzim penal për ministren e Infrastrukturës dhe Energjisë, Belinda Balluku, e cila sipas demokratëve, është përfshirë në një aferë korruptive. Në emër të PD-së, deputeti Helidon Bushati akuzoi ministren Balluku se për tunelin e Llogorasë shpalli si fituese kompanitë të cilat dhanë ofertën më të lartë. Sipas tij, në një kohë kur qeveria flet për krizë, taksat e shqiptarëve shpërdorohen ndërsa klientët e saj pasurohen. “Infrastrukturës, që është edhe ministria mbi të cilën bie edhe pesha e keqmenaxhimit dhe korrupsionit për situatën energjetike në vend, për të cilën do të merren 200 milionë euro borxh, që do të paguhen nga taksat e shqiptarëve, ka shpallur fitues të tenderit për ndërtimin e tunelit të Llogorasë një bashkim kompanish turke, i cili ka ofruar rreth 12 milionë dollarë më shumë se oferta më e ulët. Pra, në garën midis ‘INTEKAR YAPI’ dhe ‘ASL’ që kërkoi ta ndërtojë tunelin për rreth 17 miliardë lekë, ose 170 milionë dollarë, dhe një tjetër bashkim operatorësh, përbërë nga kompania egjiptiane ‘Concord Engineering’ dhe dy kompani shqiptare që kanë ofruar 12 milionë dollarë më pak për të njëjtën punë, në total 158 milionë dollarë, ministria e drejtuar nga Belinda Balluku zgjodhi ofertën më të shtrenjtë për xhepat e qytetarëve. Pikërisht në një kohë kur qeveria flet për krizë, taksat e shqiptarëve shpërdorohen. Dhe përpara syve të të gjithë shqiptarëve del qartë se kriza është për qytetarët, ndërsa për qeverinë është sezon pasurimi për të dhe klientët e saj. Dhe nuk janë pak, por 12 milionë dollarë që mund të shkojnë për shtresat në nevojë, jo për orekset e një grushti të vogël njerëzish. Partia Demokratike nuk do të mjaftohet vetëm me denoncimin e këtij skandali, por do të dorëzojë kallëzim penal në SPAK për drejtuesen e Ministrisë së Infrastrukturës, Belinda Balluku. Qytetarët shqiptarë nuk mund të mbajnë mbi shpinë korrupsionin e kësaj pakice, ndaj është detyra e drejtësisë t’u japë fund abuzimeve. Është detyra e drejtësisë t’i japë fund pandëshkueshmërisë së pushtetarëve që varfërojnë qytetarët, për të pasuruar veten dhe klientët më të cilët ndajnë një pushtet të paligjshëm”, tha Bushati.