Dy mina me telekomandë për 6 mijë euro, arrestohet 34-vjeçari
- Dy mina me telekomandë, të cilat do të shiteshin për një shumë prej 6 mijë eurosh janë sekuestruar nga policia e Durrësit. Operacioni i koduar “Terminali”, çoi në pranga shtetasin Paulin Deda, 34 vjeç, banues në Milot, Kurbin. Me sekuestrimin e dy minave, Policia tha se ka parandaluar ngjarje të mundshme kriminale. “Shërbimet e Komisariatit të Policisë Durrës, në koordinim me strukturat hetimore të DVP Durrës, në bazë të informacioneve të siguruara në rrugë operative se një shtetas po tentonte të shiste mina me telekomandë, kanë organizuar punën dhe kanë finalizuar me sukses operacionin policor të koduar ‘Terminali’. Shërbimet e Policisë e kanë ndaluar këtë shtetas në lagjen nr.13, Plazh, Durrës, në vendin e quajtur ‘Terminali i autobusëve’, dhe gjatë kontrollit fizik i gjetën dhe sekuestruan në cilësinë e provës materiale 2 mina me telekomandë të cilat ky shtetas do t’i shiste kundrejt shumës 6000 euro”, sqaroi Policia. Në bashkëpunim me Prokurorinë e Rrethit Gjyqësor Durrës, vijon puna për identifikimin e personave të tjerë të përfshirë në këtë veprimtari kriminale. Paulin Deda është me precedentë penalë në fushën e narkotikëve pasi në vitin 2015, u arrestua bashkë me dy vëllezërit e tij duke trafikuar drogë. Atyre iu kap sasia prej 3.5 kg kanabis. “Gjatë kontrollit të ushtruar në banesën e tyre në fshatin Malaj, Mirditë, u gjetën dhe u sekuestruan 3.5 kg lëndë bimore e dyshuar si bimë narkotike kanabis, e cila ishte në gjendje të tharë dhe e paketuar në pesë qese të mbështjella me plastmasë të tejdukshëm”, njofton Policia më 24 tetor të atij viti.