Spaçi duhet të ruhet, në përputhje me statusin e tij si një monument kombëtar shqiptar, për të kujtuar ata që vuajtën, për të nderuar ata që luftuan dhe për të na kujtuar të gjithëve ne se nuk duhet të lejojmë që kjo ligësi të ndodhë më kurrë
Ambasadorja amerikane Yuri Kim vizitoi dje së bashku me kolegun e saj të Zvicrës dhe të Suedisë kampin e burgut politik të Spaçit.
Pas vizitës, kryediplomatja reagoi përmes një postimi në rrjetet sociale ku e përshkroi burgun me një fjalë: ligësi. Sipas ambasadores së Shteteve të Bashkuara të Amerikës, Burgu i Spaçit duhet të qëndrojë dhe të ruhet në mënyrë që të kujtohen ata që luftuan komunizmin dhe si një kujtesë në mënyrë që shqiptarët të mos lejojnë më që ajo të përsëritet. Ndërkohë, kryediplomatja ndau me ndjekësit dhe bisedën që ka pasur me një ish-të burgosur, Zenel Drangu, i cili kaloi 18 vite në Spaç, sepse ishte arratisur në Jugosllavi. Ambasadorja shkroi se ai ka rrëfyer për ashpërsinë e përditshme që u shkaktohej njerëzve aty, nga rrahjet, puna skllavëruese, keqinformimi e deri te aktet imorale të sadizmit.
POSTIMI I AMBASADORES YURI KIM: “Iu bashkova disa ambasadorëve sot në një vizitë në kampin e burgut politik në Spaç (“Reparti i Riedukimit 303”). Ky vend është dëshmi e qartë dhe e tmerrshme e ligësisë – nuk ka fjalë tjetër përveçse “ligësisë” – së Enver Hoxhës dhe komunizmit. Ish-i burgosuri Zenel Drangu, i cili kaloi 18 vjet në Spaç, sepse ishte arratisur në Jugosllavi, na tregoi për ashpërsinë e përditshme që u shkaktohej njerëzve aty: rrahjet, puna skllavëruese, nxjerrja në kushte ekstreme të motit, keqinformimi, ngjallja e dyshimeve të ndërsjella, aktet imorale të sadizmit – të gjitha të krijuara për t’i zhveshur njerëzit nga dinjiteti, logjika dhe shpresa. Spaçi duhet të ruhet, në përputhje me statusin e tij si një monument kombëtar shqiptar, për të kujtuar ata që vuajtën, për të nderuar ata që luftuan dhe për të na kujtuar të gjithëve ne se nuk duhet të lejojmë që kjo ligësi të ndodhë më kurrë”. Ambasadorja e Shteteve të Bashkuara Yuri Kim. Falënderime ambasadorit zviceran Adrian Maître dhe ambasadores suedeze Elsa Hastad për organizmin e vizitës së sotme të rëndësishme.