Tërmeti 6.3 ballë trondit ishullin e Kretës, alarm për cunami
Një tërmet i fortë tronditi ishullin grek të Kretës të martën, rreth dy javë pasi një lëkundje toke vrau një burrë dhe dëmtoi qindra ndërtesa. Instituti Gjeodinamik në Athinë tha se tërmeti nënujor kishte një magnitudë paraprake prej 6.3 ballë dhe ndodhi në orën 12:24 të drekës. Ai u ndje deri në bregdetin e Turqisë dhe në Qipro, më shumë se 500 kilometra në lindje, sipas autoriteteve. Tërmete me magnitudë 4.1 dhe 4.6 ballë ndodhën minuta më vonë si pas-lëkundje të tërmetit të fuqishëm. Autoritetet raportuan një fryrje të nivelit të detit rreth portit lindor të Kretës dhe këshilluan banorët të qëndrojnë larg bregdetit. Kishte edhe një alarm për cunami, i cili u hoq më vonë. Nuk ka raportime për dëme serioze ose të lënduar, por një kishë e vogël pranë epiqendrës që ishte bosh në kohën e tërmetit u shemb pjesërisht. Policia dhe ekipet e zjarrfikësve po kontrollonin fshatrat e largëta në Kretën lindore. “Tërmeti u ndje në të gjithë ishullin dhe shkaktoi shqetësim, sepse ne ende po ndjejmë lëkundjet nga tërmeti i mëparshëm”, tha zëvendës-guvernatori rajonal i Kretës, Yiannis Leondarakis, për radion shtetërore të Greqisë. Dëshmitarët thanë se banorët e qytetit më të madh të ishullit, Heraklion, dolën jashtë kur tërmeti goditi, ndërsa nxënësit në shumë shkolla në ishull u mblodhën jashtë klasave të tyre. Qindra njerëz nga fshatrat në Jug të Heraklion mbeten të pastrehë pas një tërmeti me magnitudë 5.8 që goditi zonën më 27 shtator. Një burrë u vra, ndërsa po kryente punë restaurimi në një kishë të dëmtuar në zonë. Banorët shtëpitë e të cilëve u dëmtuan u zhvendosën në hotele dhe tenda të ngritura nga ushtria. Tërmeti i së martës tronditi gjithashtu ishujt grekë aty pranë në lindje të Kretës, përfshirë Karpathos, Kassos.