Afati 100-ditor, Çuçi: Po analizohet nga drejtori
“Drejtori i ri i Policisë ka filluar punën pikërisht me këtë”
Ministri i Brendshëm, Bledi Çuçi, deklaroi dje se drejtori i ri i Përgjithshëm i Policisë, Gledis Nano, e ka filluar punën e tij me analizën e afatit 100-ditor që Kryeministri Edi Rama i vuri para pak kohësh Policisë së Shtetit, për të luftuar krimin dhe korrupsionin brenda vetë Policisë. I pyetur nga gazetarët, gjatë deklaratës që mbajti pas mbledhjes së qeverisë, nëse do të ketë një raport përfundimtar se çfarë ndodhi me këtë afat, Çuçi tha se puna ka filluar pikërisht me këtë. “Drejtori i ri e ka filluar punën pikërisht edhe me këtë analizë. Ai do të jetë në të gjithë Shqipërinë, në qarqe të ndryshme të vendit, në takime me Policinë e Shtetit. Pa diskutim që ky raport do të shërbejë edhe si një dokument i rëndësishëm për vlerësimin e gjithsekujt në mënyrë që të vazhdojmë. Dua të theksoj që është një punë e vazhdueshme, nuk është një veprim i shkëputur, por është një punë e vazhdueshme, në mënyrë që të kemi një trupë sa më profesionale dhe me integritet të lartë edhe moral, që Policia e Shtetit të jetë në lartësinë e duhur. Kështu që drejtori i ri Policisë, pikërisht punën e ka filluar duke bërë analiza në çdo qark të Shqipërisë. Pa diskutim që edhe ministri do të ketë një raport përmbledhës lidhur me këtë gjë”, u shpreh Çuçi. Gjatë deklaratës së tij, ministri i Brendshëm tha se ishte miratuar në qeveri vazhdimi i bashkëpunimit me qeverinë suedeze, e cila ka vite që asiston Policinë e Shtetit, kryesisht në forcimin e “Policimit në Komunitet”. Sipas tij, në fazën e parë, janë ndërtuar në gjithë Shqipërinë zyrat për marrëdhënie me publikun, duke tentuar ta kthejmë Policinë në një zyrë shërbimi dhe sa më pranë qytetarëve. “Kemi forcuar strukturat e inspektorëve të ‘Policimit në Komunitet’, ndërsa tani faza e dytë të këtij bashkëpunimi, dhe kësaj ndihme, do t’ia fokusojmë sigurisë rrugore. Duke vazhduar sigurisht dhe gjithë këto struktura që kemi ngritur në marrëdhëniet e Policisë së Shtetit në raport me qytetarët apo dhe bashkëpunimin me qeverisjen vendore. Qëllimi kryesor është që të forcojmë forcën ndëshkuese në lidhje me të gjithë shkelësit në qarkullimin rrugor, një nga prioritetet tona dhe fokusi është shkëputja apo mënjanimi i çdo subjektivizmi, që vjen nga marrëdhënia e punonjësit të Policisë me shkelësin, duke futur teknologjinë. Me këtë projekt do të marrim rreth 110 smartphone, që do të jenë në duart e punonjësve të Policisë së Qarkullimit, të cilat janë çift me printin përkatës dhe menjëherë, kur evidentohet shkelja, do të emetohet edhe gjoba, duke ia dhënë në prezencë, shkelësit, apo blerjen e 6 radarëve, të cilët punojnë dhe evidentojnë çdo shkelje që lidhet kryesisht me shpejtësinë në qarkullim, ditën, natën, pa diskutim, dhe që automatikisht, për çdo shkelje e çon informacionin dhe rrjedhimisht edhe gjobën, në Qendrën Operative, pa pasur nevojë që të ‘negociojë’ , shkelësi me punonjësin e Policisë”, u shpreh Çuçi. Ndërsa sqaroi se pjesë e këtij programi do të jetë edhe harmonizimi i “database”-ve në mënyrë që “egjoba”, pra sistemi i gjenerimit të gjobës në mënyrë elektronike, të funksionojë sa më mirë për të gjithë llojet e shkeljeve. Ministri i Brendshëm u pyet edhe në lidhje me investimet në infrastrukturë dhe nëse qeveria ka në plan të rrisë pagat e punonjësve të Policisë. “Ne gjithmonë kemi pasur vëmendje për trajtimin sa më të mirë të punonjësve të shtetit nga pikëpamja financiare. Policia e Shtetit ka qenë sektori që ka përfituar më së shumti prej rritjes së pagave. Kjo nuk do të thotë që ne nuk do ta rishohim prapë dhe pa diskutim që jemi duke menduar edhe këtë gjë”, tha Çuçi.