Kthehet kaosi në Veri të Kosovës, serbët hedhin granata kundër Policisë
Kreu i Listës Serbe paralajmëron “rezistencë” të serbëve lokalë ndaj Kosovës, Vuçiç shkon në Rashkë: Jemi me ju!
Policia e Kosovës ka kryer një aksion kundër kontrabandistëve të mallrave në Mitrovicë, i cili u pasua me një “uragan” deklaratash dhe reagimesh nga pala serbe.
Presidenti i Serbisë, Aleksandar Vuçiç, u bëri thirrje përfaqësuesve të BE-ë që të ndërhyjnë, “ose do të ndërhyjmë ne”, me tone kërcënuese pak ditë pas samitit ndërkombëtar të “paqes” që u mbajt në Beograd. Për NATO-n, aksioni i Policisë së Kosovës ishte një aksion për zbatimin e ligjit. Një zyrtar i NATO-s tha se “Policia e Kosovës është duke kryer një operacion të zbatimit të ligjit përgjatë Kosovës” dhe se “misioni i KFOR-it, i udhëhequr nga NATO-ja, është në komunikim të pandërprerë me të gjitha institucionet relevante në Kosovë dhe me përfaqësuesit e bashkësisë ndërkombëtare”.
Qeveria e Kosovës deklaroi se aksioni nuk ishte kundër asnjë etnie dhe se të kërkuar si shkelës të ligjit janë si nga qytetarët e etnisë serbe, ashtu edhe shqiptare në Kosovë. “Aksioni i Policisë dhe Doganës së Kosovës kundër kontrabandimit të mallrave është pjesë e luftës së autoriteteve të Kosovës kundër kontrabandës dhe evazionit fiskal”, tha ministri i Brendshëm i Kosovës, Xhelal Sveçla. “Aksioni i sotëm në katër rajone rezultoi i suksesshëm në konfiskimin e mallrave dhe arrestimin e personave të përfshirë në kontrabandimin e tyre. Ky aksion është pjesë e luftës kundër krimit të organizuar në tërë territorin e Kosovës dhe në asnjë mënyrë nuk është i drejtuar kundër qytetarëve apo lokacioneve të caktuara”, sqaroi Sveçla në një konferencë për media të mbajtur në Prishtinë më 13 tetor. Aksioni kundër kontrabandës u zhvillua më 13 tetor në rajonin e Prishtinës, Pejës, Mitrovicës së Jugut dhe Mitrovicës së Veriut. Sveçla tha se në komunat në Veri të Kosovës ka pasur dhunë të shfrenuar nga “strukturat kriminale”, që sipas tij, tani janë të patolerueshme. DHJETËRA TË LËNDUAR
Operacioni i Policisë dhe Doganës së Kosovës, që nisi në orët e hershme të mëngjesit dhe përfundoi në mesditë, u kundërshtua nga serbët lokalë, të cilët protestuan dhe ngritën barrikada. Gjatë protestave, dhjetë zyrtarë policorë kanë pësuar lëndime trupore, dhjetë banorë të Mitrovicës së Veriut kërkuan ndihmë mjekësore, ndërsa tetë persona janë arrestuar dhe shoqëruar në stacione policore. “Në të gjitha rajonet e tjera operacioni policor ka kaluar pa probleme, në Mitrovicën e Veriut grupe kriminale në mënyrë të organizuar janë grumbulluar, kanë krijuar bllokime të rrugëve me mjete të ndryshme transportuese, kanë përdorur bombola gazi, bomba shokuese, të shtëna me armë zjarri e granata dore, duke sulmuar zyrtarë doganorë dhe policorë, të cilët kanë qenë në kryerje të detyrës zyrtare”, thuhet në njoftimin e Policisë së Kosovës. Në mbrëmje bllokadat e vendosura gjatë ditës në “Lagjen e Boshnjakëve” në Mitrovicë të Veriut dhe bllokadat në magjistralen Prishtinë-Rashkë, përkatësisht në Rudarë të Zveçanit, janë hequr.
DHJETË TË KËRKUAR
Policia e Kosovës ka identifikuar dhjetë persona që dyshohet se janë të përfshirë në kontrabandë dhe janë shpallur në kërkim. “Policia e Kosovës, në bashkëpunim dhe koordinim me organet e drejtësisë, është duke kryer hetime intensive drejt identifikimit edhe të personave të tjerë të dyshuar të përfshirë në kontrabandë me mallra, por edhe në aktet kriminale dhe sulmet me mjete të rrezikshme, armë zjarri, të kryera ndaj zyrtarëve policorë dhe atyre doganorë sot gjatë operacionit”, thuhet në njoftim.
VUÇIÇ SHKON NË RASHKË
Presidenti i Serbisë, Aleksandar Vuçiç, ka vizituar të mërkurën qytetin e Rashkës, ku është takuar me përfaqësues politikë serbë nga Kosova.
Takimi është mbajtur në kazermën lokale, ndërsa të pranishmit kanë përfshirë zyrtarë të partisë kryesore të serbëve në Kosovë, Lista Serbe, por edhe përfaqësues të ushtrisë së Serbisë, si dhe qytetarë serbë nga Kosova. Sipas Shërbimit të Ballkanit të Radios “Evropa e Lirë”, ata kanë folur për shqetësimet e tyre, kanë kërkuar mbrojtje nga Serbia, ndërsa shqiptarët i kanë emërtuar me emra fyes. “Kam frikë se kemi dikë që është krejtësisht joracional në Prishtinë. Kemi edhe disa keqdashës në bashkësinë ndërkombëtare, të cilët sinqerisht duan konflikte edhe këtu, dhe duan të na fusin në konflikt. Sigurisht, unë do të doja të ruanim paqen, por nuk kemi zgjidhje”, tha Vuçiç. “Unë nuk mund t’ju ftoj të hyni në konflikt me askënd. Çfarëdo që të ndodhë, Serbia dhe Beogradi do të jenë me ju. Këtë nuk po e them për formalitet. Ata që më njohin e dinë shumë mirë se çfarë do të thotë kjo”, shtoi Vuçiç.
“REZISTENCË” Kryetari i Listës Serbe,
Goran Rakiq, ka thënë se nëse diçka e tillë ndodh edhe një herë, do të ketë një rezistencë të përgjithshme të popullit serb. “Nëse diçka e tillë ndodh herën tjetër, ne do të bëjmë rezistencë të përgjithshme. Çfarë do të thotë dhe sido që e kuptoni ju, President. Ne do të mbrohemi me gjithçka që kemi në dispozicion”, ka thënë Rakiq në takim. Më herët gjatë ditës, Kryeministrja e Serbisë, Ana Bërnabiç, ka ftuar bashkësinë ndërkombëtare që të reagojë për aksionin kundër kontrabandës që Policia dhe Dogana e Kosovës zhvilluan. “I bëj thirrje bashkësisë ndërkombëtare, NATO-s dhe KFORit, që të reagojnë urgjentisht dhe të ndalin Albin Kurtin. Situata është më se dramatike dhe ky është momenti i fundit në të cilin është i nevojshëm një reagim i qartë për të ndaluar politikën e çmendur të ndjekur nga Prishtina. Kjo lloj sjelljeje ka tejkaluar çdo masë dhe na çon në prag të kaosit”, tha Bërnabiç përmes një komunikate për mediat.