Tabaku: Paratë që shpenzon qeveria nuk janë eficente
Referuar deklaratës së Fondit Monetar Ndërkombëtar për Shqipërinë, nënkryetarja e Partisë Demokratike, Jorida Tabaku, akuzon qeverinë se ka dështuar në rritjen e ekonomisë. Sipas Tabakut, qeveria i shpenzon paratë në mënyrë joeficente, duke mos prodhuar vende pune, por mbështet miqtë e saj. “Qeveria po dështon në manaxhimin dhe rritjen e të ardhurave në buxhet edhe si pasojë e informalitetit të lartë dhe keqmenaxhimit të taksave. Qeveria po dështon te shpenzimet, investimet janë joeficente dhe qytetarët e ekonomia nuk fitojnë prej tyre. Me pak fjalë, investimet nuk prodhojnë rritjen e dëshiruar ekonomike, rritjen e punësimit dhe një shëndet më të mirë të ekonomisë”, tha Tabaku. Ndërkohë, ajo ngriti shqetësimin e projekteve me partneritet publik privat, kostoja e të cilave, sipas Tabakut, ka shkuar sa gjysma e prodhimit të brendshëm bruto. “Situata me PPP-të është në kufijtë e çmendurisë, ato zënë 50% të PBB-së për vitin aktual, duke e kthyer buxhetin e shqiptarëve në portofolin e miqve të qeverisë. Borxhi publik pritet të rritet edhe më tej jo vetëm si pasojë e rritjes së PPP-ve, por edhe si pasojë e rritjes së normave të interesit. Më e rëndë situata me shqiptarët që do të paguajnë më shumë për të blerë më pak ushqime. 51% e të ardhurave të familjeve tona shkon për ushqim dhe energji elektrike, do të na shkojë edhe më shtrenjtë! Transparenca me kontratat, me vendosjen e politikave fiskale dhe ligjet, kanë ndikuar në krijimin e një klime armiqësore me biznesin dhe taksapaguesit, por mbi të gjitha, që vendosin në pikëpyetje buxhetin në lidhje me PPP-të”, tha Tabaku.