Ndryshime në qeveri, Rama emëron 3 zëvendësministra
Në mbledhjen e djeshme të Këshillit të Ministrave janë emëruar zëvendësministrat e disa prej dikastereve të qeverisë. Enio Civici, është emëruar zëvendësministër i Bujqësisë dhe Zhvillimit Rural. Vilma Bello, ish-deputete e Partisë Socialiste e qarkut të Vlorës, është emëruar zëvendësministre e Turizmit dhe Mjedisit. Gjithashtu, në mbledhjen e djeshme të qeverisë është liruar nga detyra zëvendësja aktuale e Ministrisë së Shëndetësisë, Bardhylka Kospiri, ndërsa vendin e saj e ka zënë Denada Seferi. Vendimet janë marrë nga zëvendëskryeministri, Arben Ahmetaj, në mungesë të Kryeministrit Rama. Lëvizjet e para të zëvendësministrave ishin menjëherë pas zgjedhjeve të 25 prillit. Postin e Petro Koçit si zëvendësministër i Mbrojtjes e mori Dallëndyshe Bici, ish-drejtoreshë e IKMTIsë dhe kandidate për deputete në listën e Tiranës. Gjithashtu, Bora
Muzhaqi mori postin e zëvendësministres së Arsimit deri në krijimin e qeverisë së re ku ajo mori postin e ministres së Shtetit për Rininë dhe Fëmijët. Pritet që në ditët në vijim, Kryeministri Rama të vijojë me ndryshimin e zëvendësministrave, nga të cilët pret detyra të mirëpërcaktuara brenda dikastereve që do të punojnë. Kabineti Rama 2 trashëgon një ekip prej 33 zëvendësministrash, ndërsa nuk dihet nëse do t'i mbajë të gjithë. Nga zgjedhjet e 25 prillit, një numër zëvendësministrash kandiduan për deputetë, si Petro Koçi, Etjen Xhafaj apo Toni Gogu. Pas zgjedhjeve të 2017, Kryeministrit Rama iu desh të pastronte ministritë e tij nga shumë të punësuar të LSI-së, me të cilën kishte qenë në koalicion qeverisës, por dhe të disa aleatëve të tjerë, si PDIU-ja, eksponentë të së cilës kishin marrë poste të rëndësishme.