Ibrahimaj: Do të fokusohemi te përmirësimi i klimës së biznesit
Ministrja e Financave, Delina Ibrahimaj, deklaroi se vendi ynë do të fokusohet në përmirësimin e klimës së biznesit. Në fjalën e saj në Mbledhjen e Përgjithshme të Asamblesë së “AmCham”, Ibrahimaj u shpreh se ka ende punë kundër luftës së pastrimit të parave dhe të korrupsionit por qeveria mbetet e angazhuar të bashkëpunojë me partnerët e saj. “Qasja ime dhe e qeverisë ndaj biznesit ka qenë e hapur, dëgjuese dhe bashkëpunuese. Gjatë procesit të fiskalizimit kam dëgjuar të gjitha sugjerimet e komunitetit të biznesit, takimet me dhomën Amerikane kanë qenë të frytshme dhe kanë ndihmuar në zbatimin e ligjit të fiskalizimit në vend. Që në ditët e para të detyrës time jam njohur me rekomandimet e Axhendës së Investimeve që ju keni ndërmarrë dhe do shërbejnë si platformë për bashkëpunimin tonë në mënyrë që investimet të rritet. Dëshmi e qartë për mbështetjen e biznesit janë reduktimi i burokracive dhe rritja e konkurrencës. Pritshmëritë për rritjen ekonomike janë një nivel prej 7.6 për qind. Jeni goditur nga tërmetit e pandemia por keni ruajtur vendet e punës gjatë vitit 2019-2020. Ne e dimë që përpjekjet nuk janë të mjaftueshme, prandaj jam këtu për t’u garantuar që të gjitha rekomandimet, dhe indekset që bëni janë të rëndësishme për të përmirësuar klimën e biznesit. Kemi punë për të bërë në kuadër të luftës së pastrimit të parave dhe të korrupsionit. Fiskalizimi është ndihmë për të luftuar informalitetetin. Ka shumë për të bere në respektimin e kontratave, por reforma në drejtësi është një nga pikat kyçe për mbështetje. Korrupsioni dhe informaliteti janë problemet që keni më shume sot dhe këtu do fokusohet edhe puna jonë duke ngritur sisteme për të lehtësuar bërjen e biznesit në Shqipëri”, tha Ibrahimaj.